Pjaca faktu Juventus manager Allegri

Massimiliano Allegri chuan Champions League last 16-a Porto laka goal hmahruai khungtu Marko Pjaca chu a rilru leh taksa a puitlin chhoh zel avangin goal tam zawk a khung theih a beisei thu a sawi chhuak.

Italian champion Juve hian Porto an lenchilh ṭumin goal an khung thei lawk lo a, second half-ah substitute pahnih Pjaca leh Dani Alves te goal goal khat ve ve hmangin 2-0 in hnehna an chang.

Juve manager Allegri chuan, "Theihna a nei a, chumi a phochhuah hlan chu ka nghakhlel ṭhin hle. Tunah chuan a rilru a huaisen tawh a, a taksa a fit ṭhain hma a sawn zel bawk, ani hnen aṭang hian goal tam zawk kan beisei a nih pawhin a sual lo ang," tiin kum 21-a upa a midfielder a fak.

Croatia intrenational Pjaca hian Dinamo Zag­reb tan match 92 a khelh aṭanga goal 28 a khung hnuah Juventus a zawm a, Juve tan hian match 14 khel tawhin Porto lakah khan Italian club tana a goal hmasa ber a khung ve chiah a ni.

Turin club hi Cham­pions League bakah Serie A lamah pawh an kaltluang rih hle, league match 25 khelh tawh aṭangin point 63 hmuin hmahruaitu an ni mek a, an hnuai chiaha awm AS Roma aiin point sarihin an sang zawk mek - zanin dar 1:15 hian Empoli an lo mikhual ang.