Mourinho-a'n Arsenal a mikhual dawn

"Arsenal chuan lawmna tur an zawng chawp mai a ni," tiin Tottenhman manager Jose Mourinho chuan hmanni lawk khan Arsenal chanchin a sawi a, a thusawi hi Gunners lam huat tawk a tling - Pathianni zan dar 9:00 hian Tottenham Stadium-ah an intawng ang.

Premier League table thlir chuan Arsenal leh Spurs hi an dinhmun a ṭha tawk lo, champion nih inchuh a ni dawn lo a, a sang pali zinga tel tur zawnna pawh a ni phak lo - European football erawh an la beisei. North London derby a nih tawh erawh chuan a boruak a sang leh dawn.

I awih zawng a ni emaw, ni lo emaw pawh ni se Arsenal leh Tottenham te hi league match 34 khelh tawh chinah chuan Sheffield United hnuaia awm an ni! Zanina chak zawk hian Sheffield hi an lehpel thei a, chutih rualin lehpel tur chuan Chris Wilder-a naute an chetsual a ngai tel.

June 28 khan Mikel Arteta naute hian FA Cup quarfinal-ah Sheffield an hneh. July 7, Thawhlehni zan khan league match-ah Sheffield lakah Mourinho naute hi 3-1 in an tlawm thung. North London club pahnih dinhmun tehna tur ni lo mah se tun hnai an nihna dik tak a ni si.

Sheffield an hneh vangin Gunners lamin Spurs hi til elna ṭhenkhat an nei a, manager Mourinho erawhin a ngai ho hle, "An che chhia a, lawmna tur hi an zawn chawp a ngai vel mai mai a ni," tiin a kap let. Pathianni zana hamrik hnuhnung a rik huna lawm zawk nih an tum ruh dun khawp ang.

Pariatna Arsenal leh pakuana Tottenham inthlauhna hi point khat chauh a ni a, hnehna chang zawk zawk chu table-ah pawh a chungnung zawk an ni dawn, an inhnehtawk a nih erawh chuan Arteta naute an sang chhunzawm dawn.

Thawhlehni zanah Arsenal leh Leicester City an inkhel a, Ningani zanah Tottenhman chuan Bournemouth an hmachhawn chauh - North London derby an khelh nan Gunners lamin inbuatsaihna hun an nei hnem zawk.

Hun chawpchilh mah se Mourinho chuan an inpeih thu sawiin, "Engtik lai pawhin inbuatsaihna chu kan nei reng, taksa chau deuh mah se buaina tur kan nei chuang lo. Hetiang hun atan hian kan inbuatsaihna a nei tawh, keini aiin darkar 48 velin chawlhna hun an ngah zawk.

"Darkar 24 pawhin danglamna a siam thei, tuna kan inthlauhna erawh darkar 48 a tling. Huaisen takin kan bei dawn a, tunah hian point tlemtein kan hniam zawk rih a ni mai thei, hnehna chang chungin kan kalsang ang, chu chu kan thil tum a ni," tiin a sawi.

Spurs hian hrem vangin Eric Dier an chhawr thei dawn lo a, Arsenal pawhin Foxes an hmachhawn ṭuma hnawh chhuah Eddie Nketiah hremna chu hnuk let turin ngen mah se Football Association-in a pawm lo, match thum a inlan thei dawn lo.