Spurs an chelh

Nilaini zan Premier League inkhelah Tottenham leh Bournemouth te goal awm loin an inhnehtawk a, European football khelh tum leh inhamtan tuma point mamawh em em team pahnihte point khat ve veah an lungawi a ṭul.

Mikhual Spurs lam tan Harry Kane chuan penalty hlawh chhuakah inngai mah se VAR hman a nih hnuah pek an ni lo. Cherries pawhin chakna goal khungah inngai mah se Joshua King-a hand ball chu VAR-in a hmuh avangin an hnawl bawk.

Vitality Stadium-ah Tottenham tlarhma an hriam lo a, striker leh captain ni bawk Harry Kane chuan minute 78 hma lam khan an khingpui box chhungah ball khawih a nei lo - minute 90 chhungin target zawna pet an nei lo.

Tottenham hian an defender Eric Dier chhawr thei lo mah se a zawnin goal an chhuah lo a, tlarhma hriam tawk lo mah se Jose Mourinho naute an nih ang ngeiin tlarhnung chu an veng ṭha; inkhel hmuhnawm tak erawh an pho chhuak thei lo a ni.

Portuguese manager Mourinho chuan, "Inkhel kan thunun hneh hle, goal hmaa kan hriam tawk lo tih erawh phat rual a ni lo. Danglamna siam turin player ka siksawi a, mahse goal kan khung thei chuang lo. Bournemouth khan point hmuh phu khawpin an khel," tiin an khingpui a fak.

Point khat hlu tak an hlawh chhuah hnuah Bournemouth boss Eddie Howe chuan Premier League khel chhunzawm tura beisei an la neih thu a sawi. Cherries hi 18-na an ni mek a, an chunga awm Watford an phak lohna chu point thum a ni.

Howe chuan, "A pawimawh lai chu kan chak lo kaltluang a tawp hi a ni. Spurs laka point kan hmu hian inrintawkna min siamsak thar leh a, theihna kan nei a ni tih a lantir bawk, a tawp thlengin kan bei zui ang," a ti.

Liverpool leh Crystal Palace an hneh loh hnuah Covid-19 vangin an chawl a, an lo kir leh hnuah Wolves, Newcastle leh Manchester United an hneh lo vek; tunah erawh point an sual chhuak ve leh ta - Pathianni zanah Leicester City an mikhual leh ang.