Atletico leh UN thawhdunna video-ah Mizo rawlthar Hriata a lang

Atletico de Madrid Foundation leh United Nations Alliance of Civilizations (UNAOC) te chuan Ningani khan chi leh chi inthliarna dona kawnga thawkdun turin inremna an ziak. He project pual hian "One Humanity" video ti chhuakin football star rual zingah Atlético Madrid-a inzir mek Republic Veng rawlthar Lalhriatpuia Chawngthu (Hriata) a lang.

Video-ah hian Atletico Madrid captain Koke Resurreccion bakah Jan Oblak, Angel Correa, Thomas Partey leh Thomas Lemar te an lang a, academy-a awm player dangte pawh langin an hnam ṭawng ṭeuh an hmang. 

Hriata hian 'Ṭawng inang lo vek kan hmang a' (We speak different languages) tih lai chu Mizo ṭawng ngeiin a rawn sawi a, India ram ringawtah pawh ṭawng 780 a awm laia UN leh Atletico Madrid video siama Mizo ṭawng a ri ve hi a ropui hle.

Football star rual chuan, "Kan hmelhmang a hrang a, hmun hran hran aṭangin kan kal khawm a, ṭawng inang lo vek kan hmang a, hnam ze hrang kan nei a, mahse mihring hmun khat vek kan ni," tiin mihring in pum khatna chungchang an chham.  Atletico-ah hian Tata Trusts hmalaknain India ram aṭangin mi 10 an inzir mek. June 2019 aṭangin Spain-ah an awm ṭan a, kum thum chhung an inzir ang a, an chet ṭhat dan a zirin an contract hi pawhsei theih a ni. Mi 10 inzir mekte hi India hmarchhaka mi te vek an ni a, Lalhriatpuia Chawngthu bakah hian Mizo pahnih Rosangzuala (Zotlang, Lunglei) leh Zonunpuia (Chaltlang Lily Veng) te an awm bawk a ni. Hriata leh Zoa te hi Tata Trusts enkawl football academy Centre of Excellence (COE), Mualpuia inzir ṭhin an ni a, Mizoram Under 15 League-ah pawh COE hi an champion pui tawh a ni.