Aizawl FC leh East Bengal an inum ; Mizo mipuiin Mizo club ṭawiawm ṭha

Inrinni tlaiah Aizawl FC-in Brandon VL Remdika goal hmangin Chennai City FC chu 1-0 in an hneh a, Mizo club-in a vawi khat nan I League-ah hma an hruai. Amaherawhchu zan lamah East Bengal-in champion lai Bengaluru FC 3-1 in an sawp a, Red and Gold hi table chung berah awm lehin Mizo club hma hruai hun chhung chu darkar nga a ni.

Mizo tlangval Brandon
Hero of the match-a thlan Bran­don-a'n inkhelh hmain, "Khelmual pawnah in theihna zawng zawng chhuahin min ṭawiawm ula, khelmual chhungah theihtawp kan chhuah ve ang e," tiin mipui a cho phur.

Hunthar tlangval sawmna Mizo mipuiin an tihlawhtling a, Aizawl FC player-ten an theihna zawng zawng chhuah let vein, Brandon-a'n Mizo club chakna goal a khung.

Goal awmchhun hi minute 53-naa lut a ni a, Aizawl FC forward Bayi Kamo Stephane ball cross ṭha zet chu Brandon-a'n goal-ah a chantir, Hunthar tlangval hian tun season I League-ah goal thum khung tawhin hero of the match-ah ṭum hnih thlan a ni tawh bawk.

A awlsam lo
An khingpuiin an mual an hmang thiam tih hretu Chennai City coach Soundararajan-a'n point khat hlawh chhuah tumin game plan a siam. Brazilian forward Charles de Souza chu tlar hmaah a mal tlat a, midang zawngin goal venhim hna an thawk.

ZoFooty Statistics aṭangin inkhel dan kalhmang a lang chiang a, first half bikah Mizo club-in 79% zet ball possession an nei pha hial. Hun chanve hmalamah hian Chennai City-in goal zawnah vawi khat pawh an pet lo a, Mizo club erawhin vawi ruk an pet thung.

Beisei san lutuk vanga an sel nasat Ivorian forward Kamo chu ṭum dang zawng aiin a khel ṭha a, AFC striker hi a thawhrim a, Mizo mipui pawhin a hnathawh an lawmpui thiam tawh.

Mizo club tan captain Alfred Kemah Jaryan chu team khalh kaltu a ni a, season liam taa forward naran tak kha tun season-ah chuan I League midfielder ṭha ber zinga mi a ni.

Syrian midfielder Mahmoud al Amna-a'n inkhelh a thiam a, Aizawl FC goal nawr theihna chhan pakhat a ni. Mumbai FC aṭanga Mizo club zawmtu Jayesh Rane-a'n a vanglai a hmang chho zel a, Mizo tlangval R. Laldanmawia leh Brandon-a te mual sirah an hmuhnawm bawk.

East Bengal lama chakna goal khungtu Sialhawk tlangval Danmawia'n Chennai City lamah pawh goal a khung teuh a, crossbar a pet per bakah keeper Karanjit Singh-a'n a dan sak a, goal khung theihna tur hun ṭha balance fuh loh vangin a hlah bawk.

Khelmual chhunga langsar ber erawh Chennai City keeper Karanjit Singh a ni a, mualneitu lakah South Indian club hi bet mah se chak an tum lo miau a, draw chauha an lungawi avangin Mizo club tan a awlsam lo.

Brandon-a goal-in Chennai City beiseina chu engmah loah a chantir a, mipui puihna nen Mizo club-in point thum hlu tak an sual chhuak.

Aizawl FC-in khualmuala 0-2 laia an hneh loh Chennai City lakah hnehna an chang a, Soundararajan hote hi player thlir pawha tawnhriat nei ṭha zawk an nih avangin Mizo club tan result ṭha a ni.

Khel ṭha zawk an chak
Chennai City coach Soundara­rajan chuan, "RG Stadium-ah kan player-te'n harsatna an nei a, an ṭhat dan berin an khel chhuak thei lo. Chutihrualin kan harsatna hi Aizawl FC pawhin kan muala an rawn kal ṭum khan an neih ve tho ka ring a, chuvangin chhuanlam atan hman kan tum lo - team ṭha zawk an chak a ni. Kan keeper phei chu khel ṭha lo se goal tam zawk kan chhuah ang," a ti.

Aizawl FC coach Khalid Jamil chuan, "Player-te thawrhimna zara point thum kan hmu. Min ṭantute hi ka chhuang a, hei aia ṭha hi an awm chuang lo. Inkhelh ṭan aṭanga a tawp thlengin min au phur a, kan supporter-te chungah kan lawm em em a ni," tiin result-ah leh mipui chungah a lawm thu a sawi.

Blues an mualpho
Season liam ta khan Bengaluru FC-in inhliam vangin Robin Singh chu ISL club Delhi Dynamos aṭangin an la let duh lo a, Indian striker hi I League-ah season khat tawp awl mah se East Bengal-in an player hlui hi an la ring ngam.

Sree Kanteerava Stadium-ah Lalrindika Ralte chu hrem vangin a inlan lo a, Mizo tlangval Robert Lalthlamuana'n East Bengal tan captain armband a hreng.

Haitian forward Wedson Anselme-a'n minute 23-naah Red and Gold tan a khung a, Robin Singh-a'n a club hlui lamah goal hnih (54', 59') a khung leh bawk. Blues tan minute 85-naah CK Vineeth-a'n goal khat chhang let mah se match sarih chhung chak hmel hmu tawh lo Albert Roca hote mualphona a hliah khuh zo lo.

East Bengal tan Mizo tlangval David Lalrinmuana pawh a vawi khat nan Red and Gold jersey hain khelmual chhungah second half-ah a rawn tlan lut bawk.

Nomawi inchuh
East Bengal-in Kolkata Derby zawha North East club pahnih an draw hnuah nomawi inchuhna kawnga an elpui Bengaluru an dah ṭha a, Albert Roca hote hi match khatin khel tlem mah se hmahruaitu Red and Gold aia point 12 zeta an hnufual tawh avangin an champion zawh a rinawm tawh lo.

I League nomawi beisei thei chu vawi khat champion tawh Mohun Bagan bakah la champion lo East Bengal leh Aizawl FC te chiah an awm ta.

Mariners hi Asia khawmualpui hnuaia inelna an hmachhawn avangin Bengaluru FC leh Shillong Lajong te nena an inkhelh hun sawn hlat a ni a, match hnihin an khel tlem chungin an hmelma East Bengal an phak lohna chu point thum a ni.

Mizo club hi pahnihna a ni mek a, nomawi inchuh kawnga kawng dik an zawh zel avangin en liam theih an ni tawh lo.

Chutihrualin Aizawl FC hmabak erawh a la ko hle - March 4-a an hmachhawn tur Mumbai FC hi defensive game khel thiam Santosh Kashyap-a enkawl a ni. Match sarih khelh tura match nga hi khualmuala khelh tur a ni bawk.