Pune-ah Australia-in India an sawp

India-in test match vawi 19 hneh loh an tawn loh hnuah Australia lakah an mualpho. India rama test match vawi li khelh tura hmasa berah Aussies hian Pune-ah run 333 in hnehna an chang. Test match vawi hnihnaa hi March 4, Inrinni khian M. Chinnaswamy Stadium, Bengaluru-ah khelh a ni ang.

First innings-ah Australia-in run 260 chauh an siam a, batting nei ṭha India-in run 105 chauhin an chhang let a, captain Virat Kohli-a'n run a siam lo. Second innings-ah Aussies captain Steve Smith-a'n run 109 a siam tling a, mikhual team hian run 285 vaw chhuakin India tana an target siam zat chu run 441 a ni.

India bat hun a thleng a, run siam tam ber Cheteshwar Pujara pawhin run 31 chauh a siam. Mahni mualah Team India-in run 107 chauh an tlin a, Aussie left-arm spinner Steve O'Keefe chuan second innings-ah run 35 chauh pein wicket ruk a la a, first innings-ah pawh hetiang zat tho run pe hian wicket ruk tho a la bawk.

India captain Virat Kohli chuan, "Kum hnih chhunga kan batting chhiat ber ṭum a ni a, kan hneh hlawl lo a ni. Kan inkhel tur hi kan la lap pawh ni lo a, ni thum chhung khan kan khel ṭha tawk lo a ni," tiin a sawi. Men in Blue hian kum 2012 hnuah an mualah test series-ah chak loh an la nei lo a, test match vawi thum khelh hmabakah an insiamṭhat a ṭul dawn a ni.