Champion tur Chelsea?

Premier League hma­hruaitu Chelsea-in Inrinni zanah Swansea City 3-1 in an sawp a, Stamford Bridge-a point thum an hmuh avangin Antonio Conte hote hian point 63 an hmu tawh - champion tur a chiang tawh mai em?

Blues-in Jose Mou­rinho kaihruaina hnuaia nomawi an chawi hnu­hnun ber ṭum aiin match 26 khelhah point thumin an hmu tam zawk a, anmahni hnaih bertu Manchester City aia point 11-a an san fal tawh avangin Chelsea hi champion turin an dinhmun a ṭha tawh hle.

Cesc Fabregas-a'n Pre­mier League-a match 300 a inlanaah Chelsea tan minute 19-naah goal hmahruai a khung. Swansea-in first half injury time-ah Fernando Llorente tauh luh hmangin an sut.

Chelsea an vannei zui a, box chhungah defender Cesar Azpilicueta kutin ball a fuh nachungin re­feree-in Welsh club penalty a pe lo. Chelsea tan Pedro-a'n minute 72-naah goal a khung a, minute 84-naah Diego Costa-a'n chak nemnghehna goal a khung leh bawk.

Antonio Conte hote tan tawnhriat nei ṭha player an pawimawh a, goal thumna luh theih nan Eden Hazard a pawimawh hle. Italian manager Conte chuan, "First half-ah pawh injury time-ah an rawn khung a, an vannei tel bawk a ni. Ka player-ten an zia an chhuah a, chak duhna thinlung an lantir a, chak kan phu a, kan chhunzawm zel a ṭul bawk," tiin a sawi.

Swansea boss Paul Cle­ment chuan, "Chance neih dan aṭanga teh chuan chak an phu a, amah­­erawhchu hun pawimawhah kan tana ṭhatna turin thutlukna siam a ni lo," tiin penalty hmu se inkhel a danglam theih a rin thu a sawi.

Inkhel Results
Chelsea 3 - 2 Swansea City
CHE : Fabregas 19'; Pedro 72'; Costa 84'
SWA : Llorente 45'
Crystal Palace 1 - 0 Middlesbrough
CRY : Van Aanholt 34'
Everton 2 - 0 Sunderland
EVE : Gueye 40'; Lukaku 80'
Hull City 1 - 1 Burnley
HUL : Huddlestone 72' (P)
BUR : Keane 76'
West Brom 2 - 1 Bournemouth
WES : Dawson 10'; McAuley 21'
BOU : King 5' (P)
Watford 1 - 1 West Ham United
WAT : Deeney 3' (P)
WES : Ayew 73'