Ancelotti-a'n match 1,000 a thleng Bayern-in Hamburg sawp

Carlo Ancelotti chuan ma­nager a nih hnuah match 1,000 a hmachawn tling ta a, Inrinni zan khan Bayern Munich chu an mikhual Hamburg lakah 8-0 in hnehna a chanpui.

Allianz Arena-a inkhelah German champion tan hian Robert Lewandowski chuan hattrick a siam a, Kingsley Coman chuan goal hnih khung­in Arturo Vidal, David Alaba leh Arjen Robben ten goal khat ṭheuh an khung ve bawk.

Poland international striker Lewandowski hian tun hnaia league match hnuhnung 10 a-

ṭangin goal 12 a khung tawh a, tun season-ah goal 19 khungin Pierre-Emerick Aubameyang nen an khung zat a inang. Inkhel dangah Borussia Dortmund chuan Freiburg 3-0 in an hneh a, Greek defender Sokratis Pa­pastathopoulos-a'n goal hma­hruai a khung hnuah Gabonese forward Aubameyang-a'n goal hnih a khung belh.

Pahnihnaa awm RB Leipzig chuan Cologne 3-1 in an hneh. League match 22 khelh tawh aṭangin Bayern Munich-in point 53 hmuin hma an hruai chhunzawm a, Leipzig hian point ngain an phak lo a, pathumna Borussia Dortmund-in point 40 an hmu tawh bawk.

Italian manager Ancelotti hi khawvela manager hlawhtling berte zinga mi a ni. Bayern a pan hma hian Parma, Juventus, AC Milan, Chelsea, Paris Saint-Germain leh Real Madrid te a enkawl tawh. Premier League, Serie A leh Ligue 1 nomawi a chawi tawh a, Real Madrid leh Milan hi Champions League nomawi a chawi pui.

Kum 57-a upa Ancelotti chuan, "Ni hlimawm takah duhthusama ṭhain kan khel! Ka naute hnenah inkhelh hmain mellung pawimawh ka phum ni a nih avangin ṭha taka khel turin ka hrilh a, kha tiang em em erawh kha chu ka beisei phak bik lo," tiin an result-ah a lungawi hle.

Inkhel Results
Bayern Munich 8 - 0 Hamburger SV
Bayer Leverkusen 0 - 2 Mainz 05
Darmstadt 98 1 - 2 Augsburg
Freiburg 0 - 3 Borussia Dortmund
RB Leipzig 3 - 1 Cologne
Hertha BSC 2 - 0 Eintracht Frankfurt