Ka mang ram chu a tawp ta - Ranieri Claudio tel lohna Leicester inlan zan
Leicester City-in Premier League nomawi chawipuitu coach Cluadio Ranieri an ban a, Italian manager chuan thawklehkhatah a mumang leh suangtuahna zawng zawng chu tihtawp a nih thu a sawi.
Thil theih loh nia ngaih thlentirtu coach an ban avanga chanchin ngah tak Foxes hian zanin dar 1:30-ah manager lailawk Craig Shakespeare hoin Liverpool an mikhual dawn a, khawvelin he inkhel tur hi a ngaihven - a ngaihven chhan erawh Ranieri ban a nih vang a ni a, Reds nena an inkhel tur aiin an boss hlui chanchinin ngaihven a hlawh zawk!
Beiseina thamral
Leicester-in Premier League-ah match 13 chiah khelh tur nei tawh chungin tla thei dinhmunah an ding mek a, Ranieri an ban phah.
Leicester aṭanga a puanthuah tel tura hriattir Claudio chuan, "Ka mumang chu tihtawp a ni ta. Suangtuahna rama season duhawm tak hmanga Premier League nomawi kan chawi hnuah khan ka duh ber chu ka hmangaih Leicester City-a ka hun zawng zawng hman hi a ni. Mahse, chu chu a thleng dawn ta si lo," a ti.
Italian manager chuan, "Ka nupui leh ka chhungte, tawp chin nei loa min thlawp ṭhin avangin lawmthu ka sawi a. Ka assistant Paolo Benetti leh Andrea Azzalin chungah ka lawm a, ka agent Steve Kutner leh Franco Granello ten he club enkawlna hun ṭha min siamsak avang hian lawmthu ka sawi bawk a ni. Leicester City Football Club chungah ka lawm a, kan zinkawng ngaihnawm tak kha keimahah hian a awm reng tawh ang."
"Journalist-te chungah lawmthu ka sawi a, kan thawnthu ropui tak khawvel hriata min puansaktu chu nangni hi in ni. Club-a inhnamhnawih zawng zawngte chungah lawmthu ka sawi a, ka lawmna ber erawh fan-te an ni. Ni khat ni aṭang khan in thinlungah min seng lut a, hmangaihna ka chungah in lantir a ni. Kei pawhin ka hmangaih che u. Nangni nena hlawhtlinna kan chan kha tumahin kan hnen aṭangin an la bo thei dawn lo. Nakinah chuan he hun hi keimah ang thoin hlim takin in la thlirkir ve ṭhin ang. Kha hun hlimawm leh danglam tak kha ka theihnghilh tawh dawn lo a, nangni nena champion nih kha a nuam a ni," tiin a hmangaih club a thlah.
Players vang a ni lo
Ranieri ban chhanah Foxes player-te an inrawlh nia sawi a ni a, mah se Leicester manager lailawk Shakespeare chuan hei hi phain, "Tun hnai kan result avangin player-ten hrehawm an ti ngei a, mah se Ranieri ban chhana inrawlh anga an puh hi chu a dik lo a ni. Claudio ban a nih danah ka ngaihdanin awmzia a nei lo a, kan hriat sa vek chu football-ah beisei ang result a awm loh chuan ban an ni ṭhin," a ti a, zaninah Ranieri an ban chhanin awmzia a neih leh neih loh a hriat ang. Shakespeare chuan Ranieri chuan a hnathawh ropui tak avangin zah a hlawh reng tur thu a sawi bawk.
Italian manager ban chhana inrawlh zinga tel anga sawi Jamie Vardy meuh pawh ṭawng chhuakin, "Ranieri ban a nih chhanah inrawlh anga sawi ka ni a, mah se hei hi thudik lo a ni. Claudio hi ka zah em em a, chutiang chu a ni reng ang. He team-in tihsual kan neih awmchhun chu beisei anga kan khel chhuak lo hi a ni a, kan tihsual siamṭha turin theihtawp kan chhuah ang," tiin Reds hmaa thawh an tum thu a sawi.
Thilmak chu
Leicester hmachhawn tur Liverpool boss Jurgen Klopp-a press conference-ah meuh pawh inkhel tur aiin Ranieri ban a nih chungchangah zawhna a tam zawk! German coach chuan, "Ranieri ban a ni hian min ṭhawng vak lo. Kum 2016-17 chhung khan Brexit, Trump leh thildang pawh a thleng a, thil mak hi a thleng reng mai a ni. Leicester hian eng vanga he thutlukna hi siam nge an nih ka hre lo. Claudio hi pa ṭha tak a ni a, Dortmund ka awmlai khan min rawn tlawhin kan inhre daih tawh a ni," a ti.
Klopp chuan an inkhel tur thlir nghalin, "Ranieri ban a nihna hian kan inkhel turah nghawng a nei dawn em ka hre lo a, kan tan thil a danglam phah ang em ka hrethiam lo. Leicester ṭha zawk pawh kan hmu mahna," tiin result ṭha lo vanga coach ban hlim team chu tun hma zawng aia an ṭan zawk a rin thu a sawi.
Reds players zingah damlohna avangin Daniel Sturridge leh a khupa hliam tuar Dejan Lovren te chuan Foxes an hmachhawn theih a beiseiawm loh.