An mualah Juventus ngamtu awm lo

Juventus chuan Empoli 2-0 a hnehin Serie A-ah point 10 in hma an hruai fal ta. Turin club hian Juventus Stadium-a an league match hnuhnung 30-ah hnehna an chang vek! An khelmuala point an hloh hnuhnung ber chu kum 2015 September thlaa Frosinone nen 1-1 a an inhnehtawk ṭum daih tawh kha a ni.

Inrinni zan Serie A inkhelah Juve hian Lukasz Skorupski-a own goal hmangin hma an hruai a, goal khung theihna hun ṭha tam tak an khawhral hnuah Alex Sandro chuan corner aṭanga ball lo kal chu an chak nemngheh nan minute 65-naah a khung.

Massimiliano Allegri naute hi a zawna a vawi ruk nana league champion ni turin an dinhmun a ṭha chho tawh a, nizanah league table-a pahnihna AS Roma-in Inter Milan an lenchilh a, hnehna an chang a nih pawhin Juve hian point sarihin hma an la hruai tho dawn.

Juve manager Allegri-a'n Thawhlehni zana Napoli nen Coppa Italia semifinal an khelh tur hre ranin a squad a siksawi a, Champions League last 16-a Porto hnehtu aṭangin player paruk ngawt a thlak. An league match hnuhnung zawka Palermo an hneh ṭuma manager nena buaina tenau nei Leonardo Bonucci chu inkhel bulṭantir a ni ve leh tawh.

Juventus hian 2015-16 season ṭan niah Udinese mi­khualin a an chak lo nghal. Udinese an hneh loh hnuah chak loh an nei tawh lo a, Frosinone lakah point an hloh zeuh tih mai loh chu tu tan maha dan theih loh an ni. Italian champion hi season hnuhnung pahnih an record chhunzawm turin league leh Coppa Italia chawi kawp thei dinhmunah an ding mek.

Kum 49-a upa Allegri chuan, "Inkhelh hma bakah Roma kan la hmachhawn dawn a, kan dinhmun hi ṭha tak anga sawi theih a la ni bik lo. Napoli hi nomawi chawi thei zingah thaibo theih an la ni lo a, chutih rualin kan champion leh champion loh chu kan kutah a awm tawh. Goal khung kan harsat a, point thum hmuhna tawk erawh kan khung tho - a pawimawh zawk chu a zawna match sarih chhung goal kan chhuah lo tawh hi a ni," tiin a sawi.

Milan manager hlui Allegri hian Napoli nen Coppa Italia semifinal an khelh tur chu first leg chauh la ni mah se hnehna chang ngei tura a naute a remkhawm tur thu a sawi tel bawk.

Inrinni zan inkhel dangah Atalanta chuan Napoli 2-0 in an hneh. Atalanta midfielder Frank Kessie chu minute thumna lekah hnawhchhuah ni mah se kum 22-a upa defender Mattia Caldara chuan goal hnih a khungin hnehna an chang.

Season hmasa pahnihna Napoli hian hmahruaitu Juve chu point 12 zetin an phak tawh lo a, an hnuaia awm Atalanta nen an inkarah point thum chiah a awm. Atalanta hi season hmasa khan 13-na an ni phak chauh a, kuminah hma an sawn nasa hle.