Mohammedan tan Dodoz-a goal a tawk lo

I League Second Division-ah Kolkata club Mohammedan Sporting Club-in premliminary round an paltlang zo lo.

Inrinni khan Khuman Lampak Stadium-ah NEROCA-in Mohammedan SC an mikhual a, 1-1 in an inhneh­tawk. Group B aṭangin NEROCA chu hmahruaitu an ni a, S. Mal­sawmtluanga khelhna Southern Samity-in final round an lut bawk.

Manipuri club NEROCA-in an mualah Nigerian forward Ejiogu Chinedu Emmanuel hmangin hma an hruai a, Mohammedan-in substitute Leonce Dodoz hmangin an sut. Kolkata club-in final round lut turin chak an mamawh a, Manipur-ah point khat chauh an hmuh avangin an tla.

Mohammedan tan hian Vanlal­biaa Chhangte chu a khel tluan a, Rochhingpuia chu second half-ah lutin MPL5 top scorer Laldampuia chu bench-ah a ṭhu thung. NEROCA lamah David Lalbiakzara bench-ah a awm a, ani hi group match hnuhnung ber dawta chakna goal thuntu a ni.

Group B inkhel dangah Sou­thern Samity-in Kalu Ogba, Ashim Biswas leh Moirangthem Basanta Singh te goal hmangin Hindustan FC 3-2 in an hneh. Mizo tlangval Mama chu second half ṭantirhah a tlan lut a, East Bengal player hlui luh hian 1-1 a ni a, danglamna thlentu zinga mi a ni.

Group C aṭangin Fateh Hydera­bad leh Kenkre FC ten final round an lut a, Group A erawh an la zo lo. Match hnih ṭheuh khelh hmabak la awmah Delhi United, Real Kashmir, Sudeva Moonlight leh LoneStar Kashmir te chu final round lut thei vek an ni.

Team Dinhmun
GROUP A
# Team Pld W D L GF GA GD Pts
1 Delhi United 4 1 3 0 3 1 2 6
2 Real Kashmir 4 2 0 2 5 6 -1 6
3 Sudeva Moonlight 4 1 2 1 5 6 -1 5
4 LoneStar Kashmir 4 1 1 2 2 2 0 4
GROUP B
# Team Pld W D L GF GA GD Pts
1 NEROCA FC 6 4 1 1 5 3 2 13
2 Southern Samity 6 4 0 2 10 4 6 12
3 Mohammedan SC 6 3 1 2 10 6 4 10
4 Hindustan FC 6 0 0 6 3 15 -12 0
GROUP C
# Team Pld W D L GF GA GD Pts
1 Fateh Hyderabad 6 3 3 0 7 1 6 12
2 Kenkre FC 6 3 2 1 7 4 3 11
3 Ozone FC Bengaluru 6 3 1 2 13 8 5 10
4 Pride Sports 6 0 0 6 2 16 -14 0