Dubai champion Svitolina

Elina Svitolina chuan Caroline Woznia­cki hnehin Dubai Cham­pionships nomawi a chawi a, semifinal-a a hneh tak Angelique Kerber erawhin world number 1 nih theihna hun ṭha a neih a hmang ṭangkai thei ta lo.

Inrinni zan final in­khelah world number 13 Svitolina hian seeded 10-na Wozniacki hi 6-4, 6-2 in a hneh a, WTA title paruk a lakna niin kumin bikah a nomawi pahnihna a ni.

Kum 22-a upa Svitolina chuan, "Caroline hi chu a beidawng ve ngai lo a, a tawp thlengin rim taka beih a ngai ṭhin. He hmunah hian ka champion thei tih ka fiah ta. Nomawi chawi hi chu engtik lai pawhin a nuamin a hlimawm ṭhin hle," tiin a sawi.

Svitolina hian semi­final-ah Kerber chu 6-3, 7-6 (7-3) in a hneh bawk. German nula Kerber hi Dubai-ah hian champion nise chu Serena Williams khumin world number 1 a ni leh thei dawn a, mah se a hun ṭha neih a khawlral.

Denmark nula Woz­niacki hian kum 2011 khan Dubai title hi a lo la tawh a, he inelnaah hian a inlan vawi sarih aṭanga vawi ruk zet chu semifinal a lut thei. World number 1 hlui hi kar hmasa khan Doha final-ah Karolina Pliskova lakah a lo tlawm tawh bawk.