Manchester United an chak nuam sa

Manchester United-in Thawhlehni zan khan Old Trafford-ah Istanbul Basaksehir 4-1 in an sawp. Champions League group H inkhel dangah Neymar penalty hmangin PSG-in RB Leipzig 1-0 in an hneh ve bawk.

English club tan Uruguayan striker Edinson Cavani-a'n bul a ṭan a, khelmualah erawh Bruno Fernandes a langsar. Portuguese midfielder hian goal a hnih a khung a, hattrick siam theihna turah Marcus Rashford chu penalty pet tirin Daniel James-a'n injury time-ah goal lina a khung.

Manchester United-in Premier League-ah an mualah result ṭha neih an harsat a, match nga an khelh tawhah goal thum chiah an la khung. Champions League-ah erawh Solskjaer hoten an mual an hmang thiam - match hnih lek aṭangin goal kua ngawt an pet lut.

Hei chauh hi a ni lo, Old Trafford-a Europe inelna an khelh hnuhnung pasarihah chak vekin an goal khung dan belhkhawm pawh 24-2 a ni. Thawhlehni zanah pawh hian Man United hi a tir aṭangin a tawp thlengin goal hmaah an hlauhawm hle.

Minute 7-na lekah corner aṭanga ball per chhuak chu Bruno Fernandes-a'n box pawn aṭangin a volley lut nghal. Portuguese midfielder hian minute 19-naah Turkish keeper Mert Gunok ball man sual chu awlsam takin a khung leh bawk.

Darkar chanve a liam chauh a, Basaksehir defender Boli Bolingoli-a'n uchuak taka Rashford a nek avangin penalty a chawi. Fernandes-a'n hattrick siamna hun ṭha nei mah se Rashford a kian a, English forward hian keeper bumin minute 35-naah a khung.

Second half-ah goal hmuh tur a awm mai lo a, minute 75-naah Deniz Turuc-a'n freekick aṭangin ṭha zetin a khung a, keeper David de Gea a dem theih loh. Bruno Fernandes thlaktu Mason Greenwood-a'n a hmawr a bawk fuh ṭhin loh hnuah injury time-ah Daniel James goal khung tur a siamsak.

Ole Gunnar Solskjaer-a'n ke rek hliam vangin Paul Pogba a chhawr thei lo a, French midfielder aiah Donny Van de Beek a thlang. Dutch midfielder hi Fred leh Bruno Fernandes te nen an inkawp rem hle.

Van de Beek-a'n a hunah ball a pe chhuak ṭhin a, James-a'n goal a khung theihna tura Greenwood through ball petu pawh Dutch midfielder hi a ni. Uruguayan striker Cavani a khel tluan a, second half-ah chance ṭha tak a hlah.

United manager Ole-a'n player panga a thlak avangin tlarhnung phui tawk lo lai awm bawk mah se an khel ṭha tluan tia sawi theih a ni.

United midfielder Bruno Fernandes chuan, "Hattrick siamte chu kan châk vek. Amaherawhchu Premier League inkhelh zawh khan Rahford-a bulah penalty kan hmuh leh hmasak ber a pet tur thu ka hrilh. Tu pawhin penalty hi pet se, an pet goal phawt chuan a ṭha a ni mai," tiin a sawi.

Ole Gunnar Solskjaer chuan, "Aaron Wan-Bissaka kha a ke rekah hliam a nei a, Victor Lindelof kha a hnung lamah hliam a nei bawk. Risk lak a ṭulna ka hre lo a, kartawpah an dam hman ka beisei," tiin a sawi. United hian Pathianni zan dar 7:30-ah Southampton hmachhawn turin St Mary's Stadium an tlawh ang.

•    Man United-in PSG an hmachhawn hmasa ang a, group match hnuhnung berah RB Leizpig an tlawh ang.

•    PSG-in Man United leh Istanbul Basaksehir an la hmachhawn dawn.

•    RB Leipzig hi Istanbul Basaksehir leh Man United nen an la inkhel dawn.

•    English club hian French champion hi an hneh loh a, RB Leipzig-in Basaksehir lakah point thum an hmuh bawk chuan Ole Gunnar Solskjaer hote tan group stage lut turin German club mualah point hlawhchhuah ngei a ṭul ang.

•    Group H aṭangin club pathum Man United, PSG leh RB Leipzig ten beiseina sang tak an nei vekah a ngaih theih.