April-ah Pacquiao leh Amir Khan inhnek dawn
WBO world welterweight champion Manny Pacquiao chuan British boxer Amir Khan nena an inhnek hun tur a tichiang a, April 23-ah boxer pahnih hi an inhmachhawn dawn. Pacquiao hian twitter lamah a fan-te chu amah hmachhawn tura an duh ber thlang turin a ti a, Amir Khan hian vote a hmu hnem ber a ni.
Kum 2004 Olympics-a lightweight-a silver a lak aṭanga khawvel hriat hlawh Amir Khan hian Pacquiao hnek tur hian hming chhawpchhuah ve dang British boxer Kell Brook, Australian boxer Jeff Horn leh American boxer Terence Crawford-te a khum a, 48% lai vote a hmu.
Pacquiao chuan, "Amir Khan nena kan inhmachhawn hi fan-ten an duh a ni," tiin amah ṭantute duhthlanna a zahsak thu a sawi. Kum 30-a upa Amir Khan pawhin Pacquiao nena an inhnek tur thu hi a tichiang tawh a, Pacman-a'n a inhnek lehna hmasa ber tur chu United Arab Emirates a nih thu sawi tawh mah se Amir Khan nena an inhnekna tur hmun a la puang chiang lo.
Kum 38-a upa Pacman hian nikum April khan boxing khawvel a mangṭha thu a puang a, mah se November-ah khan lo kir lehin WBO world welterweight chu Jessie Vargas hnen aṭangin a chhuhsak. Khan hian May 2016 khan a inhnek hnuhnung ber a hmachhawn thung a, Mexican boxer Saul 'Canelo' Alvarez lakah a tlawm.