Champions League & Europa League Mini Tournament a hmuhnawm dawn
Covid-19 vangin UEFA-in Champions League leh Europa League kalphung a thlak danglam a, quarterfinal aṭangin hmun khatah khelh a ni dawn - mini tournament tih theih a ni. Champions League hi Portugal-ah khelh a ni ang a, Europa League hi Germany-ah thung ang. Ṭum danga double leg-a khelh ṭhin chu match khat chauh a ni tawh dawn a, entu an awm dawn loh bawk avangin team nem zawk tan pawh final luh theihna kawng a inhawng zau hret ang.
Nimin khan Nyon, Switzerland-ah tie draw neih a ni a, Manchester City final kalkawng a harsa dawn. Pep Guardiola hote hian Real Madrid an paltlang a nih pawhin quarterfinal-ah Juventus an la hmachhawn thei a, semifinal-ah Barcelona emaw Bayern Munich emaw an la awm thei bawk. Guardiola hian Barcelona a chhuahsan hnuah Bundesliga nomawi pathum leh Premier League nomawi pahnih chawi leh tawh mah se Europe-ah a la champion leh lo. Champions League hi Spanish manager tan tehfung pawimawh a nih avangin fixture hi mangchhia a ni thei ang.
Treble champion la inbeisei Bayern Munich tan pawh kawng a awlsam bik lo a, Germany-a football thununtu Hansi Flick-a hote tan fiahna ṭha tak a ni thei ang. Atletico Madrid leh Paris St-Germain tan final kalkawng a awlsam hret dawnin a lang a, chutihrualin UCL knockout stage chinah chuan club tin hi vanduai theihna vek a ni tawh tih hriat a ṭha. Europa League lamah Manchester United tan semifinal kawng a inhawng zau a, amaherawhchu final meuh lut chuan Wolves, Sevilla emaw Roma te an hmachhawn theih avangin a awlsam dawn lo. Champion tur phei chuan United hian Antonio Conte enkawl Inter Milan bakah German club ṭha Bayer Leverkusen hmachhawn thei an la
ni bawk.
Champions League
Quarterfinal
Pool A
RB Leipzig Vs Atletico Madrid
Atalanta Vs Paris St-Germain
Pool B
Real Madrid/Manchester City Vs Lyon/Juventus
Napoli/Barcelona Vs Chelsea/Bayern Munich
Thlirna Tawi
Last 16 second leg : 7-8 August
Quarterfinal : 12-15 August
Semifinal : 18-19 August
Final : 23 August
• Inkhelh hun hi zan dar 12:30 a ni ang.
• UCL quarterfinal, semifinal leh final hi 12 -23 August chhungin Lisbon, Portugal-ah khelh a ni ang.
• Pool A lam aṭanga tlang hi final-ah home team a ni ang.
Europa League
Pool A
Olympiakos/Wolves Vs Sevilla/Roma
Lask/Manchester United Vs Istanbul Basaksehir/
FC Copenhagen
Pool B
Inter Milan/Getafe Vs Rangers/Bayer Leverkusen
Wolfsburg/Shakhtar Donetsk Vs Eintracht Frankfurt/
FC Basel
Thlirna Tawi
Last 16 2nd leg & Single leg : 5-6 August
Quarter-final : 10-11 August
Semifinal : 16-17 August
Final : 21 August
• Inkhelh hun hi zan dar 12:30 a ni ang.
• Europa League Last 16 single leg, quarterfinal hi 5-21 August chhungin Germany-ah khelh a ni ang.
• Germany-a inelna neihna tur hi MSV Arena, Duisburg; Dusseldorf Arena, Dusseldorf leh Arena AufSchalke, Gelsenkirchen te a ni ang a; final hi Stadion Koln, Cologne-ah khelh a ni ang.
• Pool A lam aṭanga tlang hi final-ah home team a ni ang.