United an champion

Jose Mourinho-a'n nomawi a keng tel tih Pathianni zanah nem­nghehin a awm. EFL Cup final-ah Manchester United-in Southampton 3-2 in an hneh a, Por­tuguese manager hi Uni­ted manager zinga season khatnaa nomawi chawi nghal thei hmasa ber a ni.

Thlirna Tawi
Wembley Stadium-ah Zlatan Ibrahimovic-a freekick hmang­in minute 19-naah United-in hma an hruai a, minute 38-naa Jesse Lingard-a goal tawih tak hmangin Mourinho hote dinhmun ṭha zawkah a hlangkai bawk. Amaherawhchu goal hnih luh hma leh luh hnuah pawh Sou­thampton chu khel ṭha zawk an ni a, United-in goal an khung hma hian Manolo Gabbiadiani goal khung chu dik lo takin offside vanga pawm a ni lo.

Italian forward Gab­biadiani hian first half injury time-ah leh second half ṭan aṭanga mi­nute thumna lekah goal hnihna khungin an siphurh a sut zo.

Claude Puel hote an hmuh­­nawm a, David de Gea chu Manchester Uni­ted player langsar niin Saints midfielder Oriel Romeu-a'n goal ban a tauh per a, Saints an vanduai.

Mourinho-a'n van­neihna beiseiin Wayne Rooney luhtir a tum a, England captain hi lut thei turin inpeih tawh mah se khelmual chhungah a hun tea rah ṭhin Ibrahimovic a awm. Swede forward Zlatan hian minute 87-naah Ander Herrera cross chu chakna goal ni turin a tauh lut. Portuguese manager-in goal venghim turin captain Rooney aiah Belgian midfielder Marouane Fellaini luhtir zawkin an goal neih an humhim a, final lut tura goal chhuah lo Saints-in goal thum an chhuah.

Sawi zui hlawh Gabbiadiani
Premier League chik tan chuan Manolo Gabbiadini hi mi thar a ni tawh lo. Italian forward hian January transfer tawp niah Saints hi pound maktaduai 14-in a zawm a, English club tana a inlan hmasak berah West Ham 1-3 in hneh lo mah se goal ṭha tak a khung nghal.

Kum 25-a upa Gabbiadini-a'n Premier League club a zawm hian Southampton-in EFL Cup final an thleng tawh a, Wembley Stadium-a inkhel bul a ṭan theih nan league-a Sunderland 4-0 a an sawp ṭumin goal hnih a khung. Match hnih leka goal thum a khung avangin Gabbiadini hi semifinal-a Liverpool lama chakna goal khungtu Shane Long aia thlan a ni.

EFL Cup-ah Gab­biadini-a'n goal thum (goal khat pawm sak a ni lo) a khung a, United tlarhnung a chhaih buai hneh viau bawk. Minute 83-naah Italian forward hi thlak a ni a, Wembley Stadium-a Saints ṭantu 32,000 chuan a phu ang ngeiin standing ovation an pe. Hetihlai hian 2-2 a ni mek a, kum 131-a upa Saints-in nomawi lian tham pahnihna la beisei mah se Ibrahimovic vangin an beiseina a thamral.

A hming chu Ibrahimovic
EFL Cup final-ah Saints an khel ṭha zawk a, amaherawhchu Mourinho-a'n French manager Claude Puel neih loh player a nei a, a hming chu Zlatan Ibrahimovic a ni.

Kum 35-a upa Swede forward hi feet ruk leh inches ngaa sang a nih avangin a awm mai mai pawh a langsar a, in­khel pawimawhah a hna­thawh avangin a langsar zual ṭhin. Inelna lian tham hmachhawn tura duan a ni a, kum upat hnuah pawh uaiin ṭha mi ang mai a la ni.

A khelhna apianga cham­pion nomawi la ziah thei Ibrahimovic hian goal hnih a khung ringawt lo a, goal hnihna hi champion-na goal a ni.

EFL Cup final-ah Zlatan a thawkrim a, goal khung tura a tlan tam ang thoin goal venghim turin tlarhnung a pui nasa bawk.

Saints hi kar hnih tawp EFL Cup final khel tura an inpuahchah laiin United-in Europa League leh FA Cup-ah match thum an khel a, Wembley Stadium-ah Mourinho naute an chauh vangin talbuai mah se man nei lo Paris Saint-Germain forward hlui Ibrahimovic-a'n Man­­ United lawmna a siam.

Man United chak pui­tu Ibrahimovic chuan, "Nomawi chawi duhin ka rawn kal a, kan hlawhtling ta phawt chu a nia. Ka champion tam poh leh ka lungawina belhchhahin a awm ang. Kan champion hi team thawhrah a ni," tiin a sawi.

Zlatan chuan, "Ka kum a tam hian champion hi a hlu lehzual. Ka kalna apiangah ka champion zel a, tuna nomawi ka chawi tawh zat chu 32 a ni. England-a ka rawn kal hma pawh hian inkhelh chawlhsan ta ila, lungawina khawp nomawi ka chawi tawh. Amaherawhchu chutiang mi chu ka ni lo a, hetiang kum ka nih hnuah pawh nomawi duhin ka la tuihal reng a ni," tiin champion zel a duh thu a sawi.

Manager thukhawchang
Man United manager Jose Mourinho chuan, "Tlang taka sawi chuan Ibrahimovic kha a khel ṭha lawr lak a, min chak pui a ni. Kan khingpui kha hun tam zawkah keini aiin an khel ṭha a, ka kutah nomawi awm ngei tur ni mah se extra time-ah hnehna chang chiah ila, a dik zawk ang," tiin Saints an khelh ṭhat thu sawi mah se champion an phu thu a sawi.

Southampton manager Claude Puel chuan, "Goal hnih kan chhuah hnuah kan tho leh a, kha aia ṭha zawk kha kan phu a ni. Amaherawhchu football a ni a miau a, United ka lawmpui. Chawimawina dawng pha si loin kan khel ṭha a, kan chhunzawm theih ngei ka beisei," tiin a sawi.