Zarate-a chawl rei dawn

Watford forward Mauro Zarate chuan In­rinni zana West Ham nen 1-1 a an inhnehtawk ṭumin a khupah hliam a tuar a, January thlaa Watford zawm ve chauh Zarate hi a rei lo berah thla ruk tal a chawlh a ngai dawn.

Kum 29-a upa forward chuan instagram lamah a khupa hliam a tawrh thu hi a tarlang a, "He hun harsa tak kara duhsakna thu min thawntute zawng zawng chungah lawmthu ka sawi a ni. Ka theihna zawng zawngin he harsatna hi ka hmachhawn ang a, tun hma zawng aia ṭha zawk­in ka lo kir leh ang," a ti.

Zarate hi Premier League-ah a mikhual hran lo. Birmingham City, West Ham leh Queen Park Rangers tan a lo khel tawh a, thlasik transfer lai khan Fiorentina aṭanga Watford hi panin match thum bak a la inlan sak hman lo.