Vawiin aṭangin MFA Cup vawi 17-na
Mizoram Football Association buatsaih District FA champion-te inelna MFA Cup vawi 17-na chu vawiin aṭangin Ṭhuamluaia Mual, Lungleiah khelh ṭan a ni dawn. Inelna hi Lunglei DFA-in an thleng ang a, March 10-ah final khelh a ni ang.
Kumin MFA Cup match hmasa berah Mizoram Premier League 6 Qualifier champion Mizoram Police-in Champhai DFA club Bethel FC an hmachhawn dawn.
Lawmman a pung
Kumin MFA Cup-ah hian champion lawmman ngai reng mah se, a bak zawng tihpun a ni. Champion-in MFA Cup bakah Rs 1,00,000 an hawn ang.
Final-a chak loin Rs 50,000 dawngin semi final-a chak lo team-in Rs 15,000 ve ve an hawn ang a, Fair Play Award-in Rs 10,000 an dawng ang. Semi final thleng phak loa group stage-a tla team paliin Rs 5,000 ṭheuh an dawng bawk ang.
Mimal chawimawina pahnih awmin Best Player leh Top Scorer hnenah trophy leh Rs 5,000 ve ve pek a ni ang.
Mizoram Police?
Police hi Aizawl DFA champion an ni a, season tharah Mizorama inelna sang ber MPL an khelh dawn avangin hetia en mai chuan team ṭha tura ngaih an ni. Chutihlaiin an player ṭha pasarih tel loin an khel dawn thung a, heng player-te hi Mizoram Santosh Trophy team leh Aizawl FC lamah an awm mek a ni.
Police player ṭha zingah hian MPL4 Best Player F Lalrinpuia, MPL-a top scorer vawi hnih lo ni tawh Lalbiakhlua bakah Lalfakzuala, Lalsangbera, Lalhmunmawia leh Lalramtharmawia-te chu Santosh Trophy team-a an khelh dawn avangin an inlan thei lo ang. Hei bakah hian an midfielder V Lalṭanpuia chuan loan-in Aizawl FC a zawm a, I League lamah a khel mek bawk.
Hei vang tak hian MFA Cup hi a hmuhnawm sawtin a rinawm a, champion 'rinkai' pawh sawi tur awm lo tluk a ni - district tinin champion-na chance an nei veka ngaih a ni.
Kalphung danglam
MFA Cup hi MFA hnuaia inelna lian ber a ni ṭhin. Mizoram Premier League khelh ṭan a nih hma phei chuan mipui ngaih hlut ber a ni a, Mizo player ṭha hlang awm khawmna a ni.
MPL khelh ṭan a nih hnuah Mizorama club ṭhate'n hmun tin aṭangin player ṭha an la khawm a, anni hi district football association hnuaia awm football club-te tan el phak an ni lo. DFA lamin 'chak lo tur chiang sa' tih hriaa MFA Cup-a team tirh reng chu ṭhain an hre lo a, MFA rorelna sangah MFA Cup kalphung thlak an rawt a, an rawtna hi a tlang ta.
Kum 2013 khan MPL club Chanmari FC chu MFA Cup-ah an champion a, he mi hnu hian tualchhung knockout inelnaahMPL club khelh phalsak an ni tawh lo.
MPL club awm loa inelna neih hnuah Champhai FC chu nomawi chawi leh hmasa ber a ni a, tuna champion lai chu MPL-a kai ta Chhinga Veng FC an ni.
MFA Cup sulhnu
Champion hmasa ber chu 1st MAP FC an ni a, anni hi vawi li an champion tawh a, champion ngun ber an ni bawk. Tunah hian 1st MAP angin team an awm tawh lo a, Mizoram Police FC-ah an inchhung lut vek tawh a, Mizoram Police tiin kum 2004 khan an lo champion tawh bawk.
Aizawl pawn aṭangin Lunglei, Khawzawl leh Champhai an champion tawh a, kumin hi Aizawl pawn tana champion-na kawng inhawn zau ṭum a ni thei. Mizoram Police hi an team chanve vel hlawk an awm loh avangin an ṭhat dan ber a ni lo tih a chiang sa a; nimahsela player ṭha leh tawnhriat nei an la kawl nual ang.
ADFA first division league aṭanga relegate ta FC Kulikawn chu vawi thum an champion tawh a; kumina inlan tur zingah Mizoram Police tih loh chu champion an la awm lo.
Kum 2015-ah MFA Cup khelh a ni lo a, hei hi kum 2014-2015 season kal mekah kum 2014 kum tawpa Champhai-a nghah a nih tawh vang a ni. Chhangphut Field siam zawh hun nghah a nih vangin kum 2013-2014 season-ah zawk khelh a ni lo a, season khat chhung an chawl a, khelmual siam zawh ve leh 2014 kum tawpah khelh a ni ta a ni.
FIXTURE KIMCHANG
GROUP STAGE
Group A
Mizoram Police, Aizawl DFA
Bethel FC, Champhai DFA
Chhimveng FC, Mamit DFA
North Gate FC, Lawngtlai DFA
February 28, Thawhlehni
11:00 AM Mizoram Police Vs Bethel FC
01:00 PM Chhimveng FC Vs North Gate
March 2, Ningani
11:00 AM Bethel FC Vs North Gate
01:00 PM Chhimveng FC Vs Mizoram Police
March 4, Inrinni
11:00 AM North Gate Vs Mizoram Police
01:00 PM Bethel FC Vs Chhimveng FC
Group B
FC College Vaih, Siaha DFA
Hmar Veng FC, Serchhip DFA
Bazar Veng FC, Lunglei DFA
Project FC, Kolasib DFA
March 1, Nilaini
11:00 AM FC College Vaih Vs Hmar Veng FC
01:00 PM Bazar Veng FC Vs Project FC
March 3, Zirtawpni
11:00 AM Hmar Veng FC Vs Project FC
01:00 PM Bazar Veng FC Vs FC College Vaih
March 6, Thawhṭanni
11:00 AM Project FC Vs FC College Vaih
01:00 PM Hmar Veng FC Vs Bazar Veng FC
SEMI FINAL
March 8, Nilaini
11:30 AM Group A winner Vs Group B runners up
01:30 PM Group B winner Vs Group A runners up
FINAL
March 10, Zirtawpni
01:00 PM Winner of SF1 Vs Winner of SF2
MFA Cup Champion tawhte
Kum Champion
1999 1st Bn MAP
2000 Vaivakawn
2002 Dawrpui Vengthar
2003 1st Bn MAP
2004 FC Kulikawn leh
MRP Joint Holder
2005 FC Kulikawn
2006 1st Bn MAP
Kum Champion
2007 FC Kulikawn
2008 Lungei
2009 Khawzawl
2010 RCFC
2011 1st Bn MAP
2012 SYS FC
2013 Chanmari FC
2014 Champhai FC
2016 Chhinga Veng FC