Spurs damna Kane Kane Kane

Harry Kane chuan tun hnai a match hnuhnung vawi kua aṭangin hat trick vawi thum a siam ta! Pathianni zan khan Europa League aṭanga tla hlim Tottenham Hotspur chuan Kane-a goal thum hmanga Stoke City 4-0 a sawpin Premier League-ah hmahruaitu Chelsea an um zel.

White Hart Lane-a inkhelah England international striker Kane hian ṭan aṭanga minute 37 chhungin goal thum a khung fel hman. Minute 14-na lekah Stoke defender ball dan per chu a ke ding lamin a hlap lut. Christian Eriksen a corner pet aṭanga ball lo kal a ke vei lam hmangin mawi zetin a half volley lut leh bawk.

Kum 23-a upa Kane hian a la duhtawk mai lo, Eriksen-a'n free-kick a thai lirh zeuh chu goal lamah hlapin Peter Crouch-a'n a lo dang kawi a, goalkeeper Lee Grant tan insiamṭhatna hun awm loin a goal, Spurs goal hnuhnug ber hi chawlhlak hma chiaha Dele Alli khung niin Kane siamsak a ni ve thung.

Premier League table-a 10-na Stoke-in second half chu an goal an venghim tluan a, Mauricio Pochettino-a nauten goal khung belh tawh lo mah se an mamawh point thum an hmu hman tho, Spurs hian point 63 hmutu Blues chu point 10 in an phak lo mek.

Kane Kane Kane

Nikum September 18 khan Tottenham chuan Kane-a goal khat hmangin Sunderland 1-0 in an hneh a, goal awmchhun khungtu Kane hi Sunderland defender Papy Djilobodji nen ball an inchuhnaah a kerek hliam vangin zawn chhuah a ngai a, league match vawi nga achawlh a ngaih phah!

Season hnih chhung Suprs top scorer ni tawh Kane hi a hliam a dam hnuah a khel ṭha chho a, tunah chuan Premier League hmatawng hriam berte zinga mi a ni. Kum 2017 bikah inelna hrang hrangah match 11 a khelh aṭangin goal 12 a khung thei.

Kane hian January thla khan West Brom lakah hat trick a lo siam tawh a, kar hmasa FA Cup fifth round inkhel a Fulham 3-0 a an hnehna goal pawh ama khung vek a ni. Kane hian tun season-ah a club tan inelna hrang hrangah goal 22 a khung tling tawh a, a zawnin season thum chhung goal 20 a khung tling ta! Spurs tan hian league bikah Robbie Keane leh Jermain Defoe ten hat trick vawi thum an lo siam tawh chu Kane (4) hian a rawn khum chiah.

League nomawi?

Season hmasa Premier League pathumna Tottenham hian Champions League group stage an paltlang zo lo a, Europa League-ah Belgian club Gent hneh loin an tla hlim bawk. League lama an khelh ṭhat dan nena khaikhin chuan Suprs hi Europe-ah an nem hle, mah se chhuanlam tur pakhat an nei.

White Hart Lane sak ṭhat mek a nih avangin Tottenham hian European game bika an home match khelh nan Wembley Stadium an hmang a, England-a khelmual hmingthang hi an hmangthiam lo hle, match an khelh hnuhnung pariatah vawi khat chiah hnehna an chang.

An khelmual pangngai White Hart Lane-ah erawh Totten­ham hi tun season league kal mekah hneh theih loh an ni. Match 13 an kheh aṭangin vawi 11 hnehna an chang a, ṭum hnih chu an khingpuite nen an inhnehtawk. Premier League-a goal chhuah tlem ber Spurs (18 goals) hi Antonio Conte tan elpui tham an tling.

Harh ngai Stoke

Xherdan Shaqiri hliam dam tawh mah se a la inkhel thei lo a, Swiss international awm loh laia Stoke buaina chu midfield a ni. Charlie Adam leh Glenn Whelan te an khawng lo a, an tlarhnung an pui ṭha tawk lo. Tun hnaia midfielder khel ṭha tluang bera ngaih Joe Allen pawh an goal thumna luhna tur free kick chawitu a ni.

Stoke manager Mark Hughes hian league table-a a sang paruk chin a ngam lo hle. Vawi 13 a hmachhawnah ṭum khat chiah hnehna a chang a, vawi 10 chak loin vawi hnih chu a draw - hengah te hian match kua zet chu goal thum an chhuah tling!

Eng nge an sawi?

Spurs boss Mauricio Po­chettino chuan, "Harry Kane hian a khel ṭha tluang hle a, khawvela striker ṭha berte zinga mi a ni. A theihna sanzia hriat chuan hetiang zat goal khung hi a phu a ni," tiin a player duhlai chu a fak hle. Argentine manager hian a naute khelh dana a lungawi thu leh Chelsea nen an inkar chu zau deuh tawh mah se na taka an nawr chhunzawm zel tur thu a sawi bawk.

Stoke boss Mark Hughes chuan, "Hun chanve hmalamah khan inkhel a zo vek tawh. Second half-ah goal kan chhuah loh avangin lawmna tur erawh a awm tho. Spurs kha team ṭha zawk an ni a, chutihrualin i khing­puite hmunawl i siamsak a nih chuan an hrem nghal zel ang che," tiin inkhel chungchang a sawi.