Dan theih loh Tsonga

Jo-Wilfried Tsonga chuan a zawnin match kua hnehna a chang ta. French tlangval hian Pathianni zan khan Lucas Pouille hnehin a vawi thum nan Marseille Open nomawi a chawi, kumina a title pahnihna a ni.

Kum 31-a upa Tsonga hian Pouille service chu vawi hnih chhuhsakin darkar khat leh minute kaw chhungin 6-4, 6-4 in hnehna a chang. Tsonga hian kum 2015 hnua a title hmasa ber la turin kar hmasa khan ABN Amro World Ten­nis Tournament-ah a champion a, tennis a khelh hun chhungin nomawi 14 a chawi tawh.

Tsonga chuan, "Chawlh­­­kar duhawm tak ka hmang zo leh ta! Ka title 14-na ka la thei hi ka lawm a, hei hi a hnuhnung ber a nih loh ka duhin ka beisei bawk. Kum bul aṭangin ka thawkrim a, ka taksa a fit ṭhat bakah inrintawkna ka nei sang hle. A zawna nomawi chawi theih hi a lawmawm bik," tiin a sawi.

Kumina match 20 a khelh aṭanga vawi 17 hnehna chang tawh Tsonga hi world number 11 nilai a ni a, Marseille Open champion a nih hian €110,655 (Rs 77,99,738.98) a dawn bakah Emirates ATP Rankings-ah point 250 a hmuh belh a, nimina ranking chhuak thar berah chuan world number 7 a ni tawh.