Mumbai FC-in chak an harsat

I League-a Aizawl FC khelh hmabak chu Mumbai FC an ni a, Santosh Kashyap-a hote hi Pathianni zan khan Minerva Punjab nen Cooperage Stadium-ah goal awm loin an inhnehtawk.

Inkhel dangah Churchill Brothers chuan table mawng­phah chhuahsan turin DSK Shivajians 3-0 in an sawp.

Mumbaikars an buai

Mumbai FC-in I League-a him ringawt duh tawk loin Khalid Jamil an ban a, Aizawl FC coach hian kum sarih tehmeuh Mumbaikars hi a enkawl hman.

Maharashtra club-in Santosh Kashyap an lalut a, season liam taa Salgaocar chhanhimtu leh Royal Wahingdoh pathumna nih pui tawhtu hian Mumbai FC chu a chhe berah pathumna nih pui ngei a tum thu a sawi. Amaherawhchu Mumbaikars hian match hmasa pahniha hnehna an chan hnuah match kaw chhung chak hmel an hmu tawh lo.

Santosh Kashyap hnuaia Mizo tlangval awmchhun Lal­chhawnkima chu match thum­naa Bengaluru FC nen an in­hmachhawn ṭumin goal luh hmain a inhliam a, Mumbai FC hi champion lai Blues hmaah 0-3 zetin an mualpho zui a, Champhai tlangval hi tun thlengin a la inlan thei lo.

Goal luh lohna chu

Cooperage Stadium-ah ṭan aṭanga minute 10-na lekah Mumbai FC right back Reagan Singh-a cross chu Brazilian striker Anderson-a'n a tauh lut a, amaherawhchu offside vangin pawm a ni lo.

Mumbai FC goal nawr a na tawk lo a, match thum chhung a zawnin goal an khung lo. Mikhual Minerva Punjab-in danglamna thlentu an nei bik lo a, hun pawimawhah Anirudh Thapa, Baoringdao Bodo leh Souvik Das te puitlin tawk lohna langin goal an khung bik lo.

Santosh Kashyap-a hoten result nei ṭha lo mah se Aizawl FC tan erawh khelhpui harsa tak an ni dawn a, Mumbai FC hian an match hnuhnung pathumah goal khung lo mah se goal an chhuah bik loh avangin Minerva Punjab bakah Bengaluru FC leh Mohun Bagan lakah point an hlawh chhuak. Mizo club tan pawh point hloh theihna an ni tih a chiang a ni.

Churchill an tho

Tilak Maidan Stadium-ah Churchill Brothers coach thar Derrick Pereira-a'n a club hlui DSK Shivajians a mikhual a, amah bantute chungah zahngaihna a lantir lo - Churchill 3-0 in an chak.

First half-a goal a luh loh hnuah Anthony Wolfe (64'), Ansumana Kromah (67') leh Surabuddin Mollick (90+4') ten second half-ah Goan club tan an khung a, Bengali midfielder Mollick-a goal khung hi goal ropui a ni.

DSK tan Mizo rawlthar pali Jerry Mawihmingthanga, Jerry Lalrinzuala, Lalnunsiama leh Sairuatkima an khel tluan a, bench aṭangin Lallianzuala Chhangte a inlan bawk.

Derrick-a hnuaiah Churchill hian match hnih khel tawhin goal sarih an khung tawh a, amaherawhchu an match hmasa bera Minerva Punjab laka goal nga zet an chhuah avangin tun hi an vawi khat chakna chauh a ni.