Torres hma hun a chiang lo

Atletico Madrid president Enrique Cerezo chuan season tawp ruala contract tawp tawh tur Fernando Torres hmalam hun a sawichiang duh lo a, fiamthuin Lionel Messi kan lakluh hunah a chiang chauh ang, a ti!

Cerezo chuan, "Tun dinhmunah chuan Lionel Messi lakluh kan tum phawt ang a, chumi zawh­ah chuan thil dang kan ngaihtuah chauh ang," a ti a, Atletico fapa rangkachak Torres chungchangah engmah a sawi lo.

Tun season-a inelna hrang hranga match 28 a khelh aṭanga goal sarih khung tawh Torres bakah hian coach Diego Simeone dinhmun a chiang lo hle. Argentine manager hian a contract neihlai titawiin June 2018 thleng bak Atletico-ah hun a nei tawh lo a, a club hlui Inter Milan enkawl a chak thu a sawi bawk.

Cerezo chuan, "Sime­one hi kan coach a ni. Thutlukna a siam apiangah keini chuan kan ring tlat a, kan hnena cham zel turin kan duh a ni," tiin an coach erawh chelh zel an tum thu a sawi chiang.