Rio champion Thiem

Dominic Thiem chuan Pablo Carreno Busta hnehin Rio Open nomawi a chawi a, Austrian player beiseiawm Thiem tan ATP Tour title pariatna a ni.

Pathianni zan final inkhelah kum 23-a upa Thiem hian darkar khat leh minute 30 chhungin 7-5, 6-4 hnehna a chang a, kumina Grand Slam tournament pahnihna tur French Open atan clay court-ah inbuatsaihna a nei ṭha chho hle.

Thiem chuan, "Player tan chuan nomawi chawi aia thil nuam leh hlimawm a awm chuang lo. Match nga ka khel a, set ka hloh miah lo. Tunkarah inelna ka hmachhawn leh nghal dawn a, ka khelh ṭhat chhunzawm zel ka beisei," tiin a sawi.

Tunkar chhung hian Mexican Open khelh zui a ni leh dawn a, Thiem hi a inlan leh nghal ang. Grand Slam vawi 14 champion tawh Rafel Nadal pawh he inelnaah hian a inlan ve dawn a, Spain tlangval hian zanin dar 9:30 hian a match hmasa berah Mischa Zverev a hmachhawn ang.