Barcelona leh Real an inum zel

La Liga boruak a sang chho zel a, Pathianni zan khan Barcelona chuan Atletico Madrid 2-1 a hnehin hma hruai zet mah se Real Madrid-in 3-2 a Villarreal an hneh ve lehnghal avangin Luis Enrique-a naute hmahruai chhung a rei lo.

Atletico leh Barcelona inkhelah minute 86 thlengin team pahnihin goal khat ve ve khungin inhnehtawk mah se Lionel Messi danglamna hmuh turin a lang nawn a, mikhual team tan chakna goal a khung. Real Madrid-in Villarreal khel­muala goal hnih an chhuah hmasak zet hnuah 'comeback' ropui an lantir a, minute 60 hnu lamah goal thum ngawt an khung.

Inkhel hmuhnawm

Atletico khelmuala inkhelah minute 64-naah goal a lut chauh a, Barcelona tan Rafinha chuan a goal khung an pawm sak loh Luis Suarez shot per nangfuhin hmahruaina goal ni turin a khung. Barca hmahruai chhung erawh a rei lo. Minute ruk a liam hman chauh tihin Diego Godin chuan Koke free-kick aṭanga ball kal chu an si phurh sutna ni turin a tauh lut.

Team pahnihin point an insem dawn nia a lan hnuah Messi a inlar a, Argentine forward hian hun tawp nan minute li chiah a awm tawh tihah a shot chu defender Stefan Savic-a'n lo dang hman mah se a chet ran chhawr ṭangkaiin a pet nawn a, Atletico goalkeeper Jan Oblak tan tih theih a awm tawh lo.

Chhandamtu Messi

Champions League-ah Barcelona-in Paris St-Germain 4-0 a an ngam loh hnuah league match hnih khelin 2-1 ve vein an chak a, inkhel pahnihah hian hnehna chang turin hun tawp dawna Messi goal khung an mamawh ve ve. Atletico khelmualah Barca keeper Marc-Andre ter Stegen chu player langsar a ni a, German keeper hian vawi hnih ngawt ropui taka Antoine Griezmann goal khung tur nia lang dan sakin Gabi-a hun ṭha neih a khawhral sak bawk.

Atletico goalkeeper Jan Oblak-a'n hna nei lo a ni bik lo, hliam vanga a chawlh reng hnua lo kir leh keeper hian Lionel Messi free kick goal ngei tur nia lang chu a dang ṭha hle. Messi erawh dan reng theih a ni lo a, hun tawp hnaihah chakna goal a khung ta tho - Argentina captain hian La Liga match 21-a khelhah goal 21 a khungna chiah a ni a, league match bika Atletico a hmachhawn vawi 21-a a goal 21-na niin Madrid khaw club tan chuan ral a ni - Messi hian Barcelona tan inelna hrang hranga vawi 400 chak hmel a hmuhna chiah a ni bawk.

Manager thukhawchang

Barcelona boss Luis Enrique chuan, "Point thum kan hmuh mai piah lamah kan hnungah Atletico kan hnutchhiah avang­in ka lawm a ni. Kan formation hman ngai loh 3-4-3 hmangin kan khel a, ball kan chan tam phah. Atletico kha hah taka Champions League khel hlim an nih bawk avangin an chau a, kan player-ten chu chu danglamna thlen nan an hmang a ni," a ti.

Atletico Madrid coach Diego Simeone chuan, "Point thum kan hlawh chhuak mai dawn emaw ka ti a, mah se a pawimawh lai ber penalty area-ah Barcelona khan an theihna an pholang a, kan tuar a ni," tiin an chak loh chhan a sawi.

Chak tum Villarreal

Tun season La Liga inkhela goal 15 chiah la chhuah Villarreal-in Real Madrid an mikhual a, minute 60 hmalam zawngah chuan he club hian goal an chhuah tlem chhan an lantir thei - minute 90 erawh an ṭang zo lo. Chawlhlawk hman a nih hmain Real hian Karim Benzema hmangin hun ṭha vawi khat an nei a, French forward ball tauh

ṭha zeta dangtu goalkeeper Sergio Asenjo chu hliam vangin lakchhuah zui a ni.

Chawlhlawk hman a nih hnuah Villarreal-in chak an tum ngam tih lantirin Manu Trigueros hmangin hmahruaina goal an khung a, fan-te hlim­thawm pawh a reh fel hmain Congolese forward Cedric Bakambu chuan Sergio Ramos ven karah a tharum ngahna chhawr ṭangkaiin an goal hnihna a khung chhunzawm.

Comeback ropui

Real-in an hmaah La Liga nomawi a inchhawp tih an hria a, awlsam taka tlawm an tum lo. Minute 64-naah Gareth Bale chuan Dani Carvajal ball cross chu goal khung nan a hmang. Minute 73-naah Real-in referee thutlukna sawisel theih tak hmangin penalty an hmu zui. Toni Kroos ball pet Victor Ruiz-a dan perin Bruno Soriano a fuh hnuah referee Gil Manzano chuan Spanish defender Bruno hian a kutin ball a khawih lui niah a ngai a, penalty spot a kawk.

Penalty pet turin Cristiano Ronaldo a lo pen chhuak a, an si phurh sutna goal khung turin Portuguese forward tan hna harsa a awm lo - Ronaldo hian league-ah penalty aṭangin vawi 57 goal a khung tawh a, La Liga-a penalty aṭanga goal khung hnem ber record a ni. Real tan substitute Alvaro Morata chuan first eleven-a hmun chan a phuzia lantir nan minute 83-naah goal a khung chhunzawm a, goal hnih chhuah hmasatu Real an chak!

Zidane-a thukhawchang

Hliam damkawr Gareth Bale chu minute 89-naah hliam vanga lakchhuah ni mah se Real Madrid boss Zinedine Zidane chuan hlauthawnawm a nih loh thu a sawi. French manager chuan, "Hliam tenau a ni a, lungngaihna tur a awm lo," a ti.

Zidane chuan inkhel chung­­­chang sawi nghalin, "Chawlh­lawk hman a nih hnuah kan khel ṭha takzet a, team tum hautak zet kan hmachhawn hnua point thum nena kan kir thei kha a ropui lai chu a ni. Goal hnih kan chhuah hnuah khan inthlak danglam kan ngai tih ka hria a, chutiang taka kan tih hnuah chuan hnehna kan chang a ni," tiin hnehna an chan vanga a hlim thu a sawi.

Real Madrid hian match 44 chhung zet chu a zawnin goal an khung tawh a, kum 1944-a Barcelona-in goal khung rei record an lo siam tawh chu an nihrual.