PSG chakna Neymar

Season liam ta Champions League finalist Paris-St Germain-in Manchester United leh RB Leipzig te an hneh loh avangin group stage paltlang lo thei dinhmunah an ding.

Thawhlehni zanah erawh  French champion PSG hian Neymar an chhawr leh thei tawh a, Germany-a an hneh loh Leipzig chu an mualah minute 11-naa Brazilian forward penalty hmangin 1-0 in an hneh.

PSG hian point ruk hmuin RB Leipzig nen point inang nei mah se away goal rule hmangin a chung zawkah an awm. Thomas Tuchel hote hi an khel ṭha tawk lo a, chanchin lawmawm erawh  inhliam vanga kar ruk chawl tawh Marco Verratti chu minute 83-naah a lut.

German club tan Dayot Upamecano, Emil Forsberg leh Marcel Sabitzer ten siphurh sutna hun ṭha an hlah vek. Leipzig hian Paris-ah inkhel thunun mah se point an hlawhchhuah loh avangin Thomas Tuchel-a'n a hna a la chelh rih thei ang.

Paris manager Thomas Tuchel chuan, "Player 11 dam ṭha neih a harsa a, tunah chuan Manchester nena kan inkhel turah kan inpuahchah zui ang. Player an dam ṭhat chuan ṭha zawkin kan khel thei ang a, kan duh ber chu chak a ni a, a ṭul a nih chuan goal venhim kan ngai pawimawh hmasa ang," tiin point thum hmuh a pawimawh thu a sawi.

Leipzig manager Julian Nagelsmann chuan, "Team ṭha zawk kan ni. Paris khan chance an nei lo a, goal an venghim tawp a ni ber. Draw tal chu kan phu a, kan chak tak si loh avangin  kan match hnuhnung pahnihah chak a ngai. Paris hi an khelh hmabakah chak lo ve ve se ka ti hle," tiin an khelh ṭhat zawk thu a sawi.