Marseille lakah PSG an hrang

Paris St-Germain chuan Mar­seille 5-1 a sawpin French Ligue 1 table-ah pahnihna an ni leh a, hma­hruaitu AS Monaco nen an inkarah point thum chiah a awm tawh.

Pathianni zan inkhelah PSG tan hian Marquinhos, Edinson Cavani, Lucas Moura leh substitute Julian Draxler ten goal khat ṭheuh an khung. Marseille defender Rod Fanni goal khat khungin awmzia a nei lo a, West Ham midfielder hlui Dimitri Payet-a'n yard 20 a hla aṭangin hun ṭha nei mah se a 'teuh' ral bawk.

Zlatan Ibrahimovic chhuah hnuah Cavani-a'n a mawhphurhna a hlen chho zel a, Uruguay interna­tional hian tun season inelna hrang hrangah a club tan match 34 a khelh aṭangin goal 35 a khung tawh.

PSG hian an league match hnu­hnung pangaah hnehna an chang vek a, point 59 hmuin Nice nen an inzat a, goal difference an neih ṭhat zawk avangin pahnihna an ni. PSG hian league nomawi an kawl lai humhim turin beisei an la nei a, French Cup last 16 an lut tawh bawk; Champions League quar­terfinal lut turin Barcelona lak­ah an dinhmun a ṭha tawh bawk a ni.

Paris Saint-Germain coach Unai Emery chuan, "Kan team hi kan inman tawh a, kan khel ṭha tluang bawk. A pawimawh ber chu ngelnghet taka kan kal theih dan tur ngaihtuah hi a ni," tiin a sawi.