Chelsea chuan season tharah neitu thar an nei dawn ta ngei e - US mi hausa Todd Boehly leh a thawhpuiten London club an leina chu UK sorkar chuan a pawmpui ta a, Blues fan-te an thaw huai ang. 
May 7 khan Todd Boehly leh a thawhpuiten Chelsea hi lei turin inremna an neihpui a, pound tluklehdingawn 4.25-in English club hlawhtling tak hi lei an rem ti. 
Mahse, Chelsea leh Boehly lam inrem mah se Premier League bakah UK sorkarin an inleina hi a pawmpui a ngai a, sorkarin a pawm loh mai hlauhthawnawma a awm hnua a pawm thei ta hi Boehly leh a thawhpuite tan chuan thu lawmawm a tling. 
Premier League chuan Thawhlehni khan Chelsea hralhna hi an pawmpui thu an lo puang tawh a, UK sorkarin a pawm ve leh ta bawk - tunah chuan season thar atan ngaihtuahna an seng ṭan thei tawh ang. 
A bul ṭanna Russia-in Ukraine a run khan khawthlang ram tam takin na takin an dem a, Russia chet dan duh lo langsar zual chu United Kingdom sorkar an ni - an theihna chin chinah Russia an hrek. 

UK sorkar hian Russia sorkar mai ni loin, Russian president Vladimir Putin nena inhnimhnai nia a hriat, sumdawng hausa thlengin a hrek a, a hrek zingah Chelsea neitu Roman Abramovich a tel. 
Britain sorkarin a hrek hma hian Abramovich hi hrek a ni dawn tih thawm a awm sa a, hei vang hian March thlatir khan London club hi a zawrh thu a puang a, a hnu lawkah UK-a a thil neihte khawih che thei loa hrek a ni zui. 
Mahse, sorkar hian Chelsea club kal zel dan tur a ngaihtuah pui a, fan-te a theihnghilh bik lo. Hei vang hian London club chu special licence pein, player leh hnathawkte hlawh pe thei turin a ti a, club zawrh a phalsak a, sum leh pai hman tur pawh hman phal chin thlengin a duansak. 
Buaina chu Chelsea lei duhin, "Kei ka ni" inti chin, mi hausa tam tak an intlar a, a tawpah London club hralh chungchang buaipuitu Raine Group chuan Boehly leh a thawhpuite inremna a neihpui a, £4.25tld-in hralh an rem ti. 

Mahse, club leh a lei duhtu lam inrem ngawt mah se, Premier League-a club neitu leh director te bakah UK sorkarin an pawmpui ve a ngai a, hei vang hian Chelsea hi an buai hman. 
UK sorkar chuan an hrek mek Abramovich hi Chelsea a hralhna aṭanga hlawkna a tel an duh lo a, amah berin Blues hralhna aṭanga hlawkna awmte chu Russia leh Ukraine indo tuartute tan a hlan tur thu sawi mah se an ring zo lo.
Abramovich hian Chelsea hnenah hian £1.5tld a puktir a, hei pawh hi a tira a sawi ang lo takin inrulhtir a tum nia sawi thawm thlengin a awm a, UK sorkar hian rin a harsat a ni ber. 
An hralh ta Sorkarin club neitu a hrek chunga Chelsea kal reng theih chhan, special licence a pek chu May 31-a tawp tur a ni a, sorkarin an inhralhna a pawm lawk bawk si loh avangin fans tam takin an hlauthawng hman. 

Mahse, Thawhlehniah Premier League-in Chelsea hralhna an pawmpui thu an puang a, UK sorkar lamin an pawmpui thu an puang ve leh ta. Sorkar thupuangtu chuan, "Thawhlehni zan, zan rei tawh takah khan UK sorkar chuan Chelsea hralhna chu a pawmsak a ni," a ti. 
Sorkar thuchhuah chuan, "Roman Abramovich hrek a nih hnuah Chelsea-in football an khelh chhunzawm zel theih nan sorkar chuan theihtawp a chhuah a, mahse, club hma hun zel tur chu neitu thar hmang chauha chinfel a ni thei, tih chu kan dinna a ni reng a ni.
"Uluk taka kan zirchian hnuah, club hralhna aṭanga hlawkna awm chu Roman Abramovich emaw hrek mek midangin an tel dawn lo tih kan pawm ta a, he club hralhna aṭanga hlawkna awm chu indona tuartu, Ukraine miten an dawn ngei theih nan hna kan thawk chhunzawm dawn a ni," an ti. 
Lawmthu UK sorkar chuan, "Vawiina kan hmalakna hian he club hlu tak hma hun zel tur a hum phah dawn a, club ṭantute leh football khawvela hun hmang zawng zawngte ven himna a ni bawk. 

"Tihfel ngai tam tak ngaihtuah chungin mi tam tak nen inbiakna pawh neih a ni a, khatih chhung zawnga min thawhpuinaah khan lawmthu kan sawi a ni," an ti. 
Chelsea leitu zingah hian Boehly chu an hmahruaitu ber ni mah se California-a private equity firm Clearlake Capital chu share ngah ber tur an ni a, US mi hausa Mark Walter leh Swiss sumdawng hausa tawntaw Hansjorg Wyss-te pawh share lian tham nei tur an ni. 
Anni bakah hian American PR executive Barbara Charone, British sumdawng Jonathan Goldstein leh British journalist Daniel Finkelstein te pawhin share an nei ang.