English football-a manager ṭha ber Klopp

Liverpool boss Jurgen Klopp chu League Managers Association's manager of the year atan thlan a ni a, Sir Alex Ferguson Trophy tia hming an pek chawimawina hi English football division-a coach zawng zawngin an thlan a ni.

Klopp hian Premier League-ah Liverpool champion pui zo ta lo mah se, Premier League manager of the year atan thlan a ni bawk - English top flight league-a coach ṭha ber dinhmun luah tur hian Manchester City boss Pep Guardiola, Brentford coach Thomas Frank, Newcastle United boss Eddie Howe leh Crystal Palace coach Patrick Vieira te a khum.

Kum 54 mi Klopp chuan, "Season hautak zet kan hmang a, ka tan chuan hei hi chawimawina ropui tak a ni. Kan duh angin league season kan khar lo a, mahse, tunah chuan kan theihnghilh tawh," a ti a, Champions League final a thlir.

Reds hian League Cup leh FA Cup-ah champion nomawi an chawi tawh a, May 28, zan dar 12:30-ah Real Madrid nen European champion nih an inchuh dawn bawk.

Klopp chuan, "Hetiang ang award dawn chuan, coach ṭha tak i nih loh pawhin coaching staff ṭha tak i nei tihna a ni mai. Chuvang chuan zaninah hian ka coaching staff zawng zawng nen kan lo kal a, an chunga ka lawmzia hi chu an hria a ni," a ti.

A vawi hnih nana LMA manager of the year ni thei Klopp chuan, "Ka coach puite min thlanna a nih avangin a hlu takzet. Mahse, football-ah hian mimal lawmman hian ka lung a len vak lo - team infiamna a nih miau avangin kan vai thawhrah a ni a, ka naute tel lo chuan engmah ka ni lo ang. Enge kan tih ho a, enge kan thawh ho theih tih chu a pawimawh ber chu a ni," tiin a sawi zui.

Chelsea boss Emma Hayes Women's Super League-a manager ṭha bera thlan a ni a, a zawna a vawi thum nan Blues chu WSL-ah hian a champion pui a, FA Cup final-ah 3-2 in Manchester City an hneh bawk.

Matt Taylor chuan League One-a Exeter City a kapui avangin League Two coach ṭha ber lawmman a dawng a, League One-a Wigan Athletic champion puitu Leam Richardson chu English third division-a coach ṭha berah thlan a ni a, season thara Premier League khel tura Fulham hruai thlengtu Marco Silva chu Championship manager of the year-ah thlan a ni bawk.