PVL final khel tur TNT

Volleyball an ngaina a, he infiamna hi an nun pakhat zinga mi a ni - Thutak Nunpuitu Team (TNT) leh volleyball sawi hran theih a ni lo. Muanna Veng team hian Hunthar hnehin Zothan Autoworks Pro Volleyball League final an lut.

TNT hian team ṭha Hunthar chu 25-20, 20-25, 11-25, 25-19, 15-13 (3-2) in an hneh a, a vawi hnih nan PVL final an khel dawn. Nizan khan Tuichangral leh Durtlang North ten semifinal hnuhnung zawk an khel, a chak zawk nen nomawi an inchuh ang.

Inkhelh hma boruak
Hunthar hian an khingpui apiang an hneh zel a, league match vawi li an khelhah hnehna an chang vek. Semifinal-a an khingpui TNT ngei pawh hi 3-0 in an sawp tawh a, table hmahruaitu ni chungin knockout round an lut.

TNT erawhin chhuan tur an nei tam lo, team panga inel zingah palina ni chungin semifinal an lut. Table hmahruaitu leh semifinal lut zinga a hniam ber intum an ni a, league round kan thlir kir a nih chuan Hunthar hi chak zawk tura rinkai an ni.

Mahse, semifinal-ah erawh TNT hi team ṭha zawk an ni a, tualchhung player hlanga khel hian an phu ang ngeiin final an lut. 2016 khan final hi an lo khel tawh bawk, kuminah a vawi khat nan champion an tum dawn.

Inkhel hmuhnawm
R. Dengṭhuama Indoor Stadium, Mualpuia inkhelah a tir aṭangin boruak a nung nghal, set hmasa berah TNT an che fuh. Rinkai lo zawk ni chungin set an la, set khatna a zawh pawh hian Hunthar chu tho chhuak tura rinkai an la ni tho.

Gagan Kumar leh Laldensanga ten thapui an thawh a, vawi hnih champion tawh Hunthar lamin set hnihna leh set thumna an la, set thumna bikah phei chuan TNT hian point 11 an hmu tling hram a, a tir lama an phurna ang kha an nei thei lo.

Hun harsa an tawh laiin TNT an buai chhunzawm duh bik lo, player ṭha Vanlalṭanchhana (Valbuanga) leh Zosangzuala te awmna hian huaisen takin set lina an la let, chak zawk chingfel turin set ngana an khelh a ngai, deciding set-ah chuan point 15 hmu hmasa nih a tawk.

Team pahnih an inkhel tawk takzet. TNT lamin point an hmu hmasa a, mahse tumah kal fal thei an awm lo. Point 13 ve ve an nei, chak turin point hnih hmuh zawn a ngai, hun pawimawh vanglaiah Valbuanga'n point rawn neiin a team a chakpui.

Zaninah hmeichhe final
Zothan Autoworks Pro Volleyball League-ah zanin hian hmeichhe final khelh a ni dawn. R. Dengṭhuama Indoor Stadium-ah Bungkawn leh Bethlehem Vengthlang ten a thiam ber nih an inchuh ang. Hmeichhe inelna liamah hian team pali an inlan. League round-ah vawi khat ṭheuh an inkhel kual, hmahruaitu Bungkawn hian an tumpui apiang an hneh vek - zanina an tum tur Bethlehem VT ngei pawh hi an hneh hnu a ni.

Bungkawn hian F. Lalparmawii chu an innghahna a ni leh dawn, ani hi match khata point 20 chuang hlawh chhuak thei ṭhin a ni, a khel sual viau a nih ngawt loh chuan team innghahna tlak a ni dawn. Bethlehem Vengthlang erawhin team thawhhona ṭha chu an innghahna a ni dawn. BVT hi Vardingliana telna Kanan chunga awm thei an ni a, mimala langsar vut sawi tur nei lo mah se Bungkawn tan fimkhur taka hmachhawn an ngai ang.