Jo-Wilfried Tsonga chuan kum 18 chhung a chenchilh tawh professional tennis a mangṭha ta. A tournament khelh hnuhnung ber French Open-ah Casper Ruud a hneh lo a, mittui nen tennis court a chhuahsan.
Thawhlehni zan first round inkhel kha Tsonga tan match hnuhnung ber a ni a, set li an inkhelh avangin an inbei tawk tih sawi nawn a ngai lo. A service hnuhnung ber a neih dawnah a mittui a dang zo lo.
Kum 37 mi Tsonga hi 6-7 (6-8), 7-6 (7-4), 6-2, 7-6 (7-0) in a chak lo, a khingpuiin point hnuhnung ber a hmuh rualin leiah a ṭhingṭhin a, clay court chu fawpin a hnuk a uluh, anmahni ramah ngei a chawl thei erawh a lawm thung.
Thlahna video tawi tih chhuah a ni a, hetah hian - Roger Federer, Rafael Nadal, Novak Djokovic leh Andy Murray te chuan Tsonga an thlahna thu an sawi, player ropuite hian an elpui ni ṭhin hi zah takin a hun tawpah an thlah.
Tsonga chuan, "Tennis ka mangṭhana ni a ni a, he hun min hriatpui tura lo kal khawm zawng zawng chungah lawmthu ka sawi. French player mai bakah khawvel player ṭha tak tak te nen zinkawng ngaihnawm kan zawh hi ka tan chuan a hlu," a ti.
A vanglai chuan Tsonga hi world number 5 hial a ni ṭhin, a hun hnuhnung lamah erawh hliam vangin a buai. Hnungzâng na vangin kum 2020 phei kha chu a inkhel lo tluan, hnehna a chan hnuhnung ber chu kumin February thla kha a ni ta.
Thawhlehni zan French Open inkhel dangah Daniil Medvedev a chak. Russian star hian Facundo Bagnis chu 6-2, 6-2, 6-2 in a hneh, a tan clay court hi hmun ṭha ni lo mah se kumina a match hmasa berah chuan harsatna a tawk lo.
Champion tura rinkai zinga mi Stefanos Tsitsipas erawhin fiahna a hmachhawn nghal. Greek tlangval hian set hnih a hloh hmasak hnuah Lorenzo Musetti chu 5-7, 4-6, 6-2, 6-3, 6-2 in a hneh let hram, thlen san a duh a nih chuan set hloh loha chak theih a pawimawh ang. Andrey Rublev leh Casper Ruud te pawhin an khingpui hnehin second round an inhlangkai ve bawk.