Canelo vs Golovkin - a vawi thum nan!

Mexican boxer 'hot' Saul 'Canelo' Alvarez chuan September-ah inhnek a hmachhawn dawn a, Gennady Golovkin nen a vawi thum nan an intawng dawn.

Kum 31 mi Canelo hian May thlatir khan Dmitry Bivol chu rin loh takin a ngam lo a, mahse, a inlanna erawh light-heavyweight a ni a, weight khatin a insawn sang.

Mexican boxer hian a duh chuan Bivol nena inhnek leh turin contract a ziak thei a, mahse, a hmaa Golovkin nena an lo inrem tawhna chu zah hmasain, a vawi thum nana Golovkin hmachhawn turin thutlukna a siam.

Fight ropui
Canelo promoter Eddie Hearn chuan, "Boxing khawvela fight ropui ber a ni dawn. Boxer pahnih, inngai lo tak an ni a, an lo intawn tawhna zawng zawng theihnghilh ṭhak khawpa in knockout an tum ve ve dawn a ni," a ti.

Boxer pahnih hi kum 2017 khan a vawi khat nan an lo intawng tawh a, sawisel theih takin inhnehtawkah puan an ni. Kum 2018 khan a vawi hnih nan an intawng a, Canelo Alvarez hi chak zawka puan a ni.

Hearn chuan, "Champion ropui pahnih intawn tawhnaa ropui ber anga chhal theih a ni dawn a, a tir aṭanga a tawp thlengin a hmuhnawm dawn," a ti a, a sawi 'hot' lawk thiam hle.

Alvarez a chesual
Canelo hian Golovkin a hneh hnuah inhnek vawi riat a hmachhawn a, vawi khat tih lohah chuan a chak - a match hnuhnung berah Bivol a ngam lo a, mahse, weight khatin a zuang sang tih erawh hriatsak a ṭha.

Kum 31 mi boxer hian WBA (Super) light heavyweight title fight atan Bivol hi a hmachhawn a, mahse, a hlawh zo ta lo - WBA (Super), WBC, IBF leh WBO super middleweight title erawh a la kawl tih hriat a ṭha.

Alvarez chuan, "Vanduaithlak takin ka tlawm a, mahse, ka chawl dawn tihna a ni lo. A pawimawh ber chu beidawn loh a ni a, hetah hian kan tawp mai lo ang. Golovkin nena kan inhnek tur leh Bivol nena kan inhnek leh tur hi boxing-a fight ropui berah ka ngai," a ti.

Golovkin a ṭha
September 2018-a Alvarez a ngam loh hnuah Golovkin a insiam ṭha a, vawi li fight hmachhawn leh tawhin hnehna a chang vek - belt pathum a hlawh chhuak bawk a, Alvarez tan a awlsam dawn lo.

Golovkin hian October 2019-a Sergiy Derevyanchenko a hneh ṭumin IBF leh IBO middleweight title a hlawh chhuak a, April 2022 khan Ryota Murata hnehin a title pahnih hi a humhim.

Chu mai a ni lo - WBA (Super) middleweight title a hlawh chhuak tel nghal bawk a, Canelo-a kawnghren pawh chuhsak vek a duh ang tih a chiang.

Record
Canelo Álvarez hian vawi 61 fight a hmachhawn tawh a, heng zingah hian vawi 57 hnehna a chang thei a, vawi hnih tlawmin, vawi hnih draw result a nei - a ngam loh hi Floyd Mayweather Jr. leh Bivol a ni a, a career ṭantir lamah Jorge Juarez chu inhnehtawkpuiin, Golovkin nen vawi khat an inhnehtawk bawk.

Kum 40 mi, Triple 'G' hming lem an pek Golovkin hian vawi 44 fight hmachhawnin vawi 42 a chak a, vawi khat a tlawm a, vawi khat draw a nei - a tlawm leh draw hi Álvarez lakah ve ve a ni a, thawnthu thar ziah kai a duh ang.

Boxer pahnih inhnek hun tur hi September 17 tih a ni a, a hmun tur erawh puanzar a la ni lo. Alvarez hian vawi 57 hnehna a chanah vawi 39 a khingpui a knockout a, Golovkin hian vawi 42 a chakah vawi 37 a knockout thung - knockout kan hmu thei dawn em? Hunin a hril thuai ang.