Champions League - Engvangin nge Real Madrid an danglam bik?

May 29, Inrinni zan dar 12:30 hian Champions League final khelh a ni dawn a, France khawpui Paris-ah Real Madrid leh Liverpool ten nomawi an inchuh ang.

Real leh Reds hi kum 2018 khan final-ah an intawng tawh a, kum li hnuah an inhmachhawn leh dawn. Jurgen Klopp-a kaihhruai Liverpool-in nasa takin hma an sawn a, Real erawh an tlahniam deuh niin lang mah se champion thei dinhmunah an ding tho.

Liverpool hi vawi ruk champion tawhin English club zinga champion ngun ber an ni a, an hmelma Manchester United champion let an champion. Real Madrid an la ropui lehzual, vawi 13 champion tawhin Reds champion let aia tam nomawi an chawi tawh.

Los Blancos hi Europe-a record nei ṭha ber an ni a, Champions League a nih chuan an danglam leh ṭhin. Eng nge a chhan ni ta ang le?

Sulhnu ṭha
Champions League hi kum 1955 aṭanga ṭan kha a ni a, hetihlai hian European Cup tih ṭhin a ni. Real Madrid hian a hmasa pangaah nomawi an chawi a, club legend Alfredo Di Stefano te bul ṭan ṭhat hi club-in a hlawkpui zel.

Real Madrid coach Carlo Ancelotti chuan, "Thil danglam a thleng. Season ṭantirh aṭang khan kan khel ṭha a, champion thei tura ngaih PSG, Chelsea leh Man City te kan hneh. Player leh fan-ten a tawp thlengin an bei. Real kawr hian hlutna lian tak a nei a, club zahawmna a keng tel," tiin final an thlen theih chhan a sawi a, Italian manager sawi ang hian Champions League-ah Real hian huhang an nei lian bik tlat.

Ancelotti hote hi Europe club lian French champion PSG, UCL champion lai Chelsea leh English champion Man City te lakah an 'comeback' vek a, an hnathawh ropui tak hi theihna sang tak an neih vang ni bawk mah se an khingpuite rilru tibuai tham sulhnu ṭha an neih vangah a ngaih theih.

Hotu ṭha Perez
Real Madrid-in record an nei ṭha a, season nga chhunga a zawna a champion hnuah kum 1966-ah nomawi chawi lehin an reh chhunzawm. European Cup hming a put laiin vawi ruk an champion.

1992–93 season aṭangin UEFA Champions League tih a ni a, Real hian 1998 leh 2000 khan final-ah Juventus leh Valencia hnehin an champion. Los Blancos-in team ṭha din nan 'ba' an ngah - euro maktaduai 270 zet ba an nei.

Kum 2000 inthlanah Florentino Pérez chu President atan thlan a ni a, a intiam ang ngeia ba a rulh fel bakah an hmelma Barcelona aṭangin Luis Figo a lalut. Real-in sum hman tur an neih theih nan Madrid training ground chu khawpui thuneitu hnenah euro maktaduai 501-in a hralh.

Real-in Galacticos an din a; Zinedine Zidane, Ronaldo, Luís Figo, David Beckham, Fabio Cannavaro, Roberto Carlos ten Real kawr an ha. Kum 2002 khan Champions League nomawi chawi lehin Zidane-a'n chakna goal a khung.

Real-in sumdawnna an zauh a, a bik takin Asia ramah an inzar pharh nasa. Perez hnuaiah football aiah sumdawnna an ngai pawimawhah an puh a, club-in kalphung thar a mamawhah ngaiin February 2006-ah a bang.

Amaherawhchu Real-in hotu an mamawh a, kum 2009 inthlanah Perez bawk hi chuhtu nei loin a tling. President hna chelh hmasak ṭum ang thoin player langsar a lalut a, club hlutna a sang leh ta sawt.

Player langsar Kaka, Cristiano Ronaldo leh Karim Benzema te chu a lalut a, coach langsar José Mourinho a sawm lut bawk. Real hian hming langsar an la zel a, Mesut Özil, Luka Modric leh Gareth Bale te pawh an lalut.

Real-in an sum hman tam rah an seng a, Carlo Ancelotti hnuaiah kum 2014 khan UCL-ah an champion a, Zinedine Zidane kaihhruaina hnuaiah a zawnin kum thum a champion. Real hi vawi 13 an champion a, khelmuala an hlawhtlin theihna chhan bulpui chu a ngaihna hria hruaitu an neih vang a ni.

Coach ṭha Ancelotti
Real Madrid-in Everton aṭangin coach hlui Carlo Ancelotti an lalut a, an tifuh hle. Italian manager hnuaiah La Liga an champion a, Champions League an beisei leh mek bawk. Ancelotti hian player angin sulhnu a nei ṭha a, manager ang pawhin ani aia nei ṭha chuang an awm lo.

Ancelotti hian Europe inelna sang pangaah league nomawi a chawi vek tawh a, hei hian a theihna sang tak a pholang. Heti taka tawnhriat nei ṭha manager hian pressure sangah player-te rawn a hreh lo. Semifinal-a Man City an hneh ṭum khan Ancelotti hian player thlak chungchangah Marcelo leh Toni Kroos te a rawn niin sawi a ni.

Pressure sangah coach hlawhtling leh rem hre ber zinga mi Pep Guardiola te meuh pawh an inthup zo ṭhin lo a, a hlauthawng tih hai rual a ni lo. Hetiang boruak karah hian Ancelotti erawh a 'cool' ṭhin a, a player-te pawhin hun tawp lamah rilru fim takin an khelh theih phah.

Italian manager Ancelotti chuan, "Ka tan chuan inkhelh hma darkar thum chho hi a harsa lai ber a ni. Tun season-ah harsatna ka tawk nasa a, thin phu a ran bakah thlan tui thlengin a chhuak tam. A ṭha lo zawngin ngaihtuahna a kal chho a, mah se vanneihthlak takin inkhelh a inṭan chiah hian a bo duak ṭhin," tiin a pawimawh hun lai berah a inthunun theih thu a sawi.

Ancelotti hian tawnhriat a nei ṭha a, AC Milan a enkawl laiin midfield-ah player ṭha rual Andrea Pirlo, Clarence Seedorf, Kaká leh Rui Costa te inlungrual takin team khatah a dah thei. Heng player ṭha pali hmang hian Milan hi 2007 UCL nomawi a chawipui a, Kaka-a'n Ballon d'Or a dawn phah bawk. Player langsar a enkawl tam tawh avangin Ancelotti tan Real player enkawl kawngah harsatna a awm lo.

An ṭha ve bawk
Cristiano Ronaldo, Sergio Ramos leh Raphael Varane ten chhuahsan mah se Real Madrid hi goalkeeper aṭanga striker thlengin belhchian an la dawl hle. Keeper Thibaut Courtois hi 2018 World Cup-a golden glove dawngtu a ni a, a vanglai hun a hmang mek.

Real hian tawnhriat nei ṭha player Karim Benzema, Toni Kroos, Luka Modric leh Casemiro te an kawl a, mahni position-a 'ber' tia chhal theih vek an ni. Benzema-a'n kum 34-na a hmang mek chungin a vanglai hun a hmang a ni ber a, match 45-ah goal 44 khung tawhin UCL-ah ringawt goal 15 a khung.

Player naupang zawk Vinicius Junior pawhin a theihna tak a pho chhuak a, tun season-ah ringawt goal 21 khungin hemi hma season thum chhunga a khung zat goal 15 aiin goal rukin a khung tam. Vini Jr theihna pho chhuaktu Ancelotti-a'n fak a phu hle.

Tlarhnung lamah Bayern Munich kulhpui David Alaba an la thei a, a kawppui Éder Militão lah Brazil rinrawl ni pha a ni. Selecao hi World Cup khel tur zawnnaah South America pakhatna an ni a, goal nga chauh an chhuah - Militao bakah Real captain Marcelo leh midfielder Casemiro theihna sawifiahtu a ni thei ang.

Real-in nipui transfer-ah Eduardo Camavinga an lalut a, Man City an hneh theih nana a pawimawh avangin euro maktaduai 30 an seng thlawn lo. Kum 2019-a euro maktaduai 45 senga an lakluh tawh Rodrygo pawhin a theihna a lantir chho. Hming langsar zawk Gareth Bale leh Eden Hazard ten bench an luahlum a, Real hi vanneih vang ngawta final thleng an ni lo - an ṭha ve bawk.