IPL team thar Gujarat Titans an ṭha tak tak

Gujarat Titans-in Indian Premier League an khelh hmasak berah final an lut nghal a, league round-ah a chung berah an awm tawh bawk. Titans-in Nilaini zan khan qualifier 1-ah Rajasthan Royals chu wicket sarihin an hneh a, an ṭha tak tak tih an nemnghet.

Nizan khan eliminator-ah Lucknow Super Giants leh Royal Challengers Bangalore te an inkhel a, heta chak zawk leh Royals hian May 27, Zirtawpni zan dar 7:30 hian qualifier 2 an khel dawn.

Final hi May 29, Pathianni zan dar 7:30-ah khelh tur a ni a, Gujarat leh qualifier 2-a chak zawk an inhmachhawn dawn. Playoff khel pha chinah Rajasthan chiah champion tawh an awm a, Royals hi champion hmasa ber ni mah se kum 2008 hnuah nomawi an la chawi leh lo.

Buttler bawk
Eden Gardens-ah qualifier 1 khelh a ni a, ṭhum vawra vannei Titans-in vawm hmasak an thlang. Tun inelnaa batter che ṭha ber Jos Buttler bawk a rawn langsar a, a vannei tel bawk.

Inkhelh hmain Matthew Hayden chuan pitch awm dan enfiahin 170-180 runs siam theihna tur a nih thu a sawi. Mahse, Royals hian over 16-ah 127 runs an siam.

Over 17-naah Buttler-a ball vuak chu Hardik Pandya tan man nuam tawk niin lang mah se Titans captain hi a tawlhthlu a, Royals batter a him. English batter Buttler hian ball 17-ah 47 runs a siam zui a, 89 runs a siam zarah Royals-in 20 overs chhungin 188/6 runs an siam.

Pandya leh Miller
Gujarat Titans hun a thleng a, Wriddhiman Saha chu run a siam hmain Royals bowler Trent Boult-a'n pavilion lamah a thawnkir. Inkhel boruak a nung sawt a, amaherawhchu Gujarat batter zingah chesual nawn an awm lo.

Shubman Gill leh Matthew Wade ten 35 runs ve ve an siam a, Hardik Pandya (40*) leh David Miller (68*) ten ṭha takin a tawp an khar. Gujarat hian over 19.3-ah 191 runs an siam a, wicket hnih chauh an hloh.

Over tawp berah hian 16 runs siam a la ngai a, man of the match-a thlan Miller chuan ball hmasa pathumah six runs vek a vaw chhuak a, Gujarat-in final an luh theih nan a pawimawh hle.

South African batter Miller chuan, "Kan team-in chance ṭha min pe a, hmun pawimawh min pe a, mimal takin hma ka sawn bawk. Over tawp berah khan chuan thil tam tak ngaihtuah a rem lo a, mahni inthunun ṭhat a pawimawh a, hun ṭha neih bawhpelh loh a ngai bawk," tiin a sawi.

IPL Thlirna Tawi
Qualifier 1 - May 25, Thawhlehni
Gujarat Titans bt Rajasthan Royals
Gujarat Titans wicket sarihin an chak

Rajasthan Royals 188/6 (20)
Jos Buttler 89 (56)
Sanju Samson 47 (26)
Devdutt Padikkal 28 (20)
Hardik Pandya 14/1
Sai Kishore 43/1
Mohammed Shami 43/1

Gujarat Titans 191/3 (19.3)
David Miller 68* (38)
Hardik Pandya 40* (27)
Shubman Gill 35* (21)
Trent Boult 38/1
Obed McCoy 40/1
Yuzvendra Chahal 32/0

Eliminator - Nizan Inkhel
Lucknow Super Giants 7:30 PM Royal Challengers Bangalore

Qualifier 2 - May 27, Zirtawpni
Rajasthan Royals 7:30 PM Winner of Eliminator

Final - May 29, Pathianni
Gujarat Titans 8:00 PM Winner of Qualifier 2