Mavericks an la tlawm lo

Dallas Mavericks chu Golden State Warriors lakah an la tlawm duh bik lo. Nimin zing Western Conference finals game 4 inkhelah Maverics hi 119-109 in an chak a, beiseina tlemte an neih chu an chhawm nung hram.

Game hmasa pthumah Golden State an chak vek a, tlang turin vawi khat chak an la mamawh. Mavericks tan chetsual a thiang tawh lo, best of seven series-ah 3-1 in an hniam mek. Zirtawpni zingah game 5 an khel leh nghal ang.

NBA hi kum 75 khelh a ni tawh, eng team mah playoff chinah 3-0 a an hniam hnuin an la tho chhuak leh ngai lo. Luka Doncic awmna Mavericks tan hna a harsa dawn, thil theih loh tawp erawh chu a ni bik lo.

Nimin zing game 4 inkhelah Donic-a'n point 30 a nei, a ṭhiante zingah point 10 nei tling player panga an awm bawk. Mimal chet ṭhat fal ai chuan thawhhona ṭhain kawngro a su thui zawk tih a takin an zir chhuak ngei ang.

Kum 23 mi Donic chuan, "Basket kan venhim dan kha a ropui ngei mai, khatiang kha kan khelh dan tur dik tak pawh a ni," a ti. Point 30 a neih bakah rebound vawi 14 a la a, assist vawi kua a nei bawk.

Tukin zing hian Eastern Conference finals lamah game 5 an khel dawn. Boston Celtics leh Miami Heat te 2-2 in an inhnehtawk mek, tlang zawk tur hriatthiam a la harsa rih hle.

Western Conference Finals
Game 1: Golden State Warriors 112 - 87 Dallas Mavericks
Game 2: Golden State Warriors 126 - 117 Dallas Mavericks
Game 3: Dallas Mavericks 100 - 109 Golden State Warriors
Game 4: Dallas Mavericks 119 - 109 Golden State Warriors
May 27, Zirtawpni
Game 5: Golden State Warriors 06:30 AM Dallas Mavericks
(Golden State hian series-ah 3-1 in hma an hruai)

Eastern Conference Finals
Game 1: Miami Heat 118 - 107 Boston Celtics
Game 2: Miami Heat 102 - 127 Boston Celtics
Game 3: Boston Celtics 103 - 109 Miami Heat
Game 4: Boston Celtics 102 - 82 Miami Heat
May 26, Ningani
Game 5: Miami Heat 06:00 AM Boston Celtics
May 28, Inrinni
Game 6: Boston Celtics 06:00 AM Miami Heat
May 30, Thawhṭanni
Game 7: Miami Heat 06:00 AM Boston Celtics
(Series-ah 2-2 in an inhnehtawk mek)
Note: Best of seven series hmangin chak zawk zawn tur a ni)