Jarrod Bowen, i tan hmun a awm e!

June-a Nations League khel tur England chuan squad an puang a, season duhawm tak hmangtu West Ham forward Jarrod Bowen chu Three Lions squad-ah koh a ni - ram tan a la inlan ngai lo.

Leicester City right back James Justin chu a vawi khat nan squad-ah telh a ni a, Fikayo Tomori pawh Serie A lama AC Milan a champion pui avangin squad-ah telh a ni bawk. Leeds United midfielder Kalvin Phillips leh Newcastle United defender Kieran Trippier te chu hliam vanga an chawlh reng hnuin koh an ni a, Liverpool captain Jordan Henderson erawh squad-ah a awm lo.

England hian June 4, zan dar 9:30-ah Hungary an lenchilh ang a, June 7, zan dar 12:15-ah Germany an pan zui ang a, June 11, zan dar 12:15-ah Italy mikhualin, June 13, zan dar 12:15-ah Hungary an mikhual bawk ang.

A hming Bowen
Kum 25 mi Bowen hi tun season-a a khelh dan enin koh ni lo se sawiseltu an tam ang - tun season inelna hrang hrangah match 51 khelin goal 18 a khung a, assist vawi 13 a nei bawk.

March thla khan Bowen hi England squad-ah telh a lo ni tawh a, mahse, a keah hliam a neih avangin ram tan a inlan thei lo - tunah a tan hun ṭha a inher chhuak ta. Kum 2013-a non-league club Hereford United-a bul ṭantu kha ram tana inlan thei dinhmunah a ding mek.

England coach Gareth Southgate chuan, "Goal hmaah a hlauhawm em em a, a football zinkawng en hian academy ropui tak chhuak nih kher a ngai lo tih a chiang - tawnhriat hi a pawimawh ber chu a ni. Team tan a thawkrim a, chu chu kan player-te ti tura kan duh em em a ni," a ti.

Hendo a tel lo
Liverpool-in Champions League final an la khelh dawn avangin Henderson koh a ni lo a, Southgate chuan, "Hendo theihna hriat belh tur ka nei tawh chuang lo a, a inkhel hnem em em bawk," a ti a, Hendo a koh loh chhan a sawi.

Tottenham Hotspur defender Eric Dier pawh koh a ni lo a, Southgate chuan,"Ani pawh kan hrechiang tawh a, kan ngaihtuahnaah chuan a awm," a ti - hetihlai hian Reds defender Trent Alexander-Arnold erawh koh a ni.

City defender Kyle Walker pawh hliam vangin April hnuah league match la khel lo mah se koh a ni a, Manchester United forward Jadon Sancho leh Marcus Rashford chu koh an ni lo bawk.

Sorry Maddison
James Maddison-a'n tun season-ah match 53 khelin goal 17 a khung a, assist vawi 11 a nei bawk. Foxes Player of the season atan thlan a ni chungin squad-ah a tan hmun a awm lo.

Southgate chuan, "Mason Mount leh Phil Foden te ho nen an inel a, a position hi kan chakna lai a ni tlat a ni," tiin a koh loh chhan a sawi a, Jack Grealish leh Raheem Sterling te koh an ni bawk.

Arsenal manager Mikel Arteta-a'n Bukayo Saka ko lo turin ngen mah se kum 20 mi forward hi koh a ni a, AS Roma tana season duhawm tak hmangtu Tammy Abraham pawh koh a ni.

England squad
Goalkeepers: Jordan Pickford (Everton), Nick Pope (Burnley), Aaron Ramsdale (Arsenal)

Defenders: Trent Alexander-Arnold (Liverpool), Conor Coady (Wolves), Marc Guehi (Crystal Palace), Reece James (Chelsea), James Justin (Leicester), Harry Maguire (Man Utd), John Stones (Manchester City), Fikayo Tomori (AC Milan), Kieran Trippier (Newcastle), Kyle Walker (Manchester City), Ben White (Arsenal)

Midfielders: Jude Bellingham (Borussia Dortmund), Conor Gallagher (Crystal Palace (loan) - Chelsea), Mason Mount (Chelsea), Kalvin Phillips (Leeds), Declan Rice (West Ham), James Ward-Prowse (Southampton)

Forwards: Tammy Abraham (Roma), Jarrod Bowen (West Ham), Phil Foden (Manchester City), Jack Grealish (Man City), Harry Kane (Tottenham), Bukayo Saka (Arsenal), Raheem Sterling (Manchester City)