Halep leh Pliskova an chak hram

French Open khelh laiah Simona Halep leh Karolina Pliskova ten an match hmasa berah fiahna an hmachhawn nghal a, champion thei tur zinga mi pahnih hian harsa takin first round an paltlang.

Halep hian 2018 khan French Open nomawi hi a lo chawi tawh, clay court in a inkhelh thiamna ni mah se tun hnaiah a khel ṭha tawk lo. Romanian star hian Nastasja Schunk chu 6-4, 1-6, 6-1 in a hneh.

Grand Slam vawi hnih champion tawh Halep chuan, "Tun hnaiah ka khelh ṭhat loh avangin inrintawkna ka nei sang lo, set thumnaah erawh nuam ti takin ka khel thei tawh," a ti. Coach thar Patrick Mouratoglou lakah beiseina a neih san thu a sawi bawk.

Inkhel dangah seeded pariatna Pliskova chuan set a hloh hmasa a, tualchhung nula wildcard hmanga inlan Tessah Andrianjafitrimo chu 2-6, 6-3, 6-1 in a hneh hram a ni.

Belarus nula Aryna Sabalenka pawh a chak awlsam bik lo. World number 1 hlui hian tualchhung player Chloe Paquet 2-6, 6-3, 6-4 in a hneh hram. Paula Badosa erawhin minute 54 chhung lekin Fiona Ferro 6-2, 6-0 in a sawp.