Australian Open sawn a ngaih hmel?

January thlaa khelh tur Australian Open 2021 dinhmun a chiang lo chhunzawm a, sorkar thuneitu lamin an sawi dan chuan inelna neih hun hi sawn hlat a ngaih hmel - thutlukna erawh siam a la ni lo.

Tennis Australia (TA) chuan tournament khelh hun hi sawn loh an duh thu an sawi tawh. Mahse, tournament khelhna hmun Melbourne awmna state 'Victoria' thuneitu lam erawhin sawn ni se an duh.

Victorian Sports and Tourism minister Martin Pakula chuan, "A hun awm dan kan han chhut hian sawn mai a ṭhat hmel hle. Rawtna tam tak a rawn thleng a, chung zingah chuan chawlhkar hnih eraw thla khat vela sawn tlai pawh a tel.

"Ngaihdan siam thiam a harsa, tun season French Open khelh hun an sawn angte pawh hi a ngai ve hial mai thei bawk. A hun sawn tum anga rawtna hi awm mah se inelna neih loh tawp erawh ngaihtuah a ni tel lo," tiin tournament chu buatsaih ngei an tum.

Tennis season kal lai hi Covid-19 vangin an buai hle. Grand Slam pali zingah Australian Open chauh hi ruahman dan pangngaia khelh theih a ni. French Open chu May thlaa khelh tur ni mah se September thla atan sawn a ngai hial.

Indopui II-na hnua a vawi khat nan Wimbledon an khel lo a, US Open chu a hun pangngaiah khel mah se a hmunah entu an awm thei lo. Tun dinhmunah hri leng damdawi a la awm loh avangin season thar pawh na takin a nghawng buai dawn a ni.

Australian Open mipa singles champion lai Novak Djokovic chuan inelna neih ngei a duh thu a sawi a, stadium ruaka inkhelh ai chuan a hmunah entu 10% chauh pawh awm thei se thil lawmawm a nih tur thu a lo sawi ve bawk.