Mizoram Lockdown (inkharkhip) Ni 111

Spanish goalkeeper Pepe Reina-a'n Liverpool tan a hming a chher hnuah Brendan Rodgers hnuaiah beisei angin hmun a chang lo a, 2013-14 season khan loan-in Napoli a zawm. Italian club tan season khat a khelh hnuah Bayern Munich a pan a, German club-ah season khat a khelh hnuin kum 2015 khan Napoli hi a nghetin a zawm. Serie A club tan 2017-18 season thleng a khel a, loan-a a khelh lai chhiar tel lohin league match 111-ah a inlansak. 

Reina hi Barcelona youth system chhuak niin Catalan club-ah bul a ṭan a, a career tir lamah B team tan khelin 2000-01 season khan La Liga-ah a inlan ṭan. 

Barca tan season hnih khelin match 49-a inlansak a, nomawi chawi nei loin kum 2002 khan Villarreal a pan. Villarreal tan season thum a khel a, a season tawp ber 2004-05 ah an club chanchina a vawi khat nan Champions League khel turin a inhlankaipui. Kum 2005-ah Liverpool a zawm a, 2012-13 season thleng khelin inelna hrang hrangah match 398-a khel - Premier League Golden Glove vawi thum a dawng a, FA Cup (1), League Cup (1), FA Community Shield (1) leh UEFA Super Cup (1)-ah nomawi a chawi bawk. Villarreal tan UEFA Intertoto Cup (2)-ah a champion a, Napoli tan Coppa Italia (1) nomawi chawiin Bayern Munich tan Bundesliga-ah a champion bawk. AC Milan aṭanga Aston Villa-a loan-a khel mek Reina hian Spain tan match 36 a khel hman a, World Cup 2010 leh Euro 2008 & 2012-a champion team-ah a tel. Kum 2011 khan Spain rama infiammite chawimawina sang Gold Medal of the Royal Order of Sporting Merit-a dawng a ni.