Brugge hmaah Erling Haaland a vul

Borussia Dortmund-in Thawhlehni zan khan Club Brugge 3-0 in sawp a, striker ṭhangduang Erling Braut Haaland-a'n goal hnih a khung. 

Signal Iduna Park-ah Norwegian striker goal khung inkarah Jadon Sancho-a'n a khung bawk a, Dortmund hian point kua hmuin group F-ah hmahruaitu an ni mek.

Kum 20 mi Haaland hi Champions League-a goal 15 khung tling thei naupang ber a ni a, match 12 chiah a mamawh. Hemi hmaa record chelhtu Ruud van Nistelrooy leh Roberto Soldado te aiin Haaland hian match sarihin a mamawh tlem zawk.

2020 Golden Boy atana thlan Haaland hi Didier Drogba nen UCL-a goal nga khung thei rang ber an ni a, match thum an mamawh. Norwegian striker goal 10 khung thei naupang ber a ni bawk a, match sarih chiah a mamawh.

Brazil striker hlui Adriano khan match 12-ah goal 11 a khung thei a, Haaland erawhin goal 15 a khung thung. Dortmund striker hian goal a khung ringawt lo a, Brugge tlarhnung a chhaih buai nasa hle.

Goal khung thei bik striker hi Lionel Messi leh Cristiano Ronaldo te hmun ruak luahtu turin an sawi a, a goal khung dan aṭanga teh chuan player ropuite huanga la  awm thei tur chu a ni chiang a ni.