Mizo tlangval Lianzuala telna Chennaiyin an chak

Indian Super League-a champion tur rinkai pawl Chennaiyin chu Thawhlehni zan khan an inlan a, South Indian club hian Jamshedpur FC chu 2-1 in an hneh. 

Chennaiyin tan Anirudh Thapa chuan minute khatna lekah goal hmahruai a khung a, tun season ISL-a Indian goal khung hmasa ber a ni. Ligue 1 club Nice striker hlui Esmael Goncalves chuan minute 26-naah penalty aṭangin a chhuih lut bawk. 

Jamshedpur tan season hmasaa Chennaiyin striker Nerijus Valskis chuan si phurh a rawn sut ṭhen a, hun tawp thlengin goal dang erawh a khung thei tawh lo. 

Mizo tlangval Lallianzuala Chhangte chuan Chennaiyin FC tan inkhel bul a ṭan a, Lunglei winger hian a team tan penalty a hlawh chhuak - Jamshedpur midfielder Isaac Vanmalsawma nena ball an inchuhna lama a hlawhchhuah a ni. 

Lianzuala hian vawi hnih ngawt chu Jamshedpur keeper TP Rehenesh enchhinna a nei a, mahse Lianzuala vanneih zan a ni lo a, NorthEast United keeper hlui Rehenesh hian ṭha zetin a dansak ve ve. 

India tana vawi 11 inlana goal li khung tawh Lianzuala hian Slovak striker Jakub Sylvestr tan goal khungna remchang a siamsak bawk a, mahse Slovakia international hlui hian a hun ṭha neih chu ho lam takin a khawhral. 

Mizo forward Lallianzuala chuan, "Kan beisei aia hmain goal kan khung a, kha khan inrintawkna min pek avangin kan game pumpuiah min pui takzet a ni. Inbuatsaihna hun kan neih tlem ngaihtuahin kan khel ṭha," tiin Vanglaini a hrilh. 

Lianzuala hian a hma sial deuh se goal khungna hun tam zawk nei thei tur a ni a, mahse Lunglei tlangvalin a ngaih pawimawh ber erawh point thum a ni. 

MPL khel tura Lunglei FC lo tlinpui tawhtu Lianzuala chuan, "Goal emaw assist neih loh hi chuan lawm a kim tak tak thei lo. Chutihrual chuan a pawimawh ber erawh team-in point thum kan hmuh a ni a, kan tum kan hlawh chhuaka kan lawm takzet a ni," tiin Vanglaini a hrilh. 

Chennaiyin tan Lianzuala bakah left back Lalchhuanmawia Fanai chuan inkhel bul a ṭan bawk a, Lengpui tlangval Chhuantea inkhel hi India coach Igor Stimac-a'n a en a nih chuan ram tana koh kir tlak a ni tih a hmu ang. 

Mizo defender ṭhangduang Jerry Lalrinzuala'n bench lamah hun a hmang a, minute 85-naah Chhuantea thlakin a tlan lut. Jamshedpur tan Laldinliana leh Isaac Vanmalsawma ten bul an ṭan a, minute 90 an khel tluan. 

Jamshedpur bench aṭangin Ricky Lallawmawma chu minute 55-naah tlan luhtir a ni a, Kolasib tlangval William Lalnunfela'n bench lamah hun a hmang tluan thung.