TNT hmaa ding tur Durtlang North

Zanin dar 8:00 hian R. Dengṭhuama Indoor Stadium, Mualpuiah volleyball inkhel hmuhnawm a awm dawn. Thutak Nunpuitu Team (TNT) leh Durtlang North ten Zothan Autoworks Pro Volleyball League 2022 final an khel ang.

Tualchhung volleyball inelna sang ber - Pro Volleyball League hi vawi nga khelh a ni tawh. TNT leh Durtlang North te hian tun hmain final vawi khat ve ve an khel tawh, a chak lo zawk ve ve an ni. Champion thar kan hmu dawn, team pakhat zawk chuan mellung an phun dawn a ni.

Inkhel hi a hmunah en theih a ni a, hall lian tak ni mah se mipui an leng vek dawn lo. LPS 1-ah live a ni dawn, mahni in lum aṭangin tualchhung volleyball inelna lian a en theih dawn.

Durtlang North an tlang
Nilaini zan khan semifinal hnuhnung zawk khelh a ni a, inkhel hmuhnawm takah Durtlang North chuan Tuichangral 25-22, 16-25, 25-18, 25-11 a hnehin final an inhlangkai a, a vawi hnih nan volleyball inelna lianah final an khel ang.

Durtlang North hian league round-ah Tuichangral hi an ngam lo. Semifinal-ah erawh a tir aṭangin an hmuhnawm a, state pawn aṭanga an chah luh Sagar Malik an chhawr thiam bakah, tualchhung player an khelh ṭhat avangin phuba an la.

Lalbiakmuana, Vanlalṭanpuia leh Vanlalmawia ten point 10 an nei tling vek a, mimal chet ṭhat falna aiin team thawhhona ṭha chu an chak chhan a ni. Zaninah pawh anni pathum hian TNT lakah an thiam thil lantir leh an tum dawn a ni.

Aizawl khawpui pawn aṭanga tel awmchhun Tuichangral erawh an duhthusam a thleng thei lo. D3 Business Player of the Night atana thlan khawpin Sahil Kumar khel mah se, player dang zingah point 10 nei tling thei an awm lo chu an tuar.

TNT an inpeih
League leh knockout hi chu a boruak a danglam ṭhin. League round-a team ṭha ber, hneh loh nei lo Hunthar kha TNT lakah an tlawm a, vawi hnih champion tawh hneh thei Muanna Veng team hian inrintawkna sang tak an nei ngei ang.

Pro Volleyball hi vawi ruk neih a ni tawh, inelna zawng zawngah TNT hi an la tel kim vek. Zanina an hmachhawn tur Durtlang North hi league round-ah khan an ngam lo, mahse Hunthar laka an khelh anga an khel a nih chuan champion an tum ngam dawn.

TNT hian player chhuak thar ṭha mi Vanlalṭanchhana (Valbuanga) an nei, ani hi India junior team tan pawha kohna dawng tawh a ni. A ṭhianten an thlawp ṭha ṭhin a, amah siam liantu TNT tana nomawi hlawh chhuah hi a thil chak berte zinga mi a ni ngei ang.

Sawi hmaih theih loh chu captain Vanlalchhantluanga Sailo a ni. Ani hian team a ho khawm ṭha ṭhin a, hun harsa an tawh lai pawha fuih phur ṭhintu a ni, final boruak sangah pawh a tawnhriat neih tawhte a naute tan a ṭangkai thei dawn.