Kerber leh Azarenka an chak

Grand Slam champion tawh pahnih Angelique Kerber leh Victoria Azarenka te chuan Nilaini zan khan French Open third round an in vaw kai a, an khelh fuh chuan anni pahnih hi nomawi chawi thei tur khawpa theihna nei sang an ni.

Kum ruk liamta khan Kerber hian French Open nomawi a chawi, major title a lak hmasak ber a ni hial. German nula hian tun ṭuma a khingpui chu Elsa Jacquemot 6-1, 7-6 (7/2) in a hneh. Jacquemot hi 2020 junior champion a ni a, tun ṭumah hian wildcard hmangin a inlan.

Seeded 21-na Kerbar hian a match lehpekah chuan Aliaksandra Sasnovich a hmachhawn ang. Belarus nula hian inkhel dangah US Open champion Emma Raducanu chu 3-6, 6-1, 6-1 in a lo hneh ve thung a ni.

World number 1 hlui Kerber chuan, "Strasbourg Open-ah ka hlawhtling a, inrintawkna sang tak nen French Open ka khelh theih pah," tiin clay court inelna lian khelh nuam a tih thu a sawi chhuak.

Inkhel dangah Australian Open vawi hnih champion tawh Azarenka pawh a chak. Ani hian 2014 Roland Garros semifinalist Andrea Petkovic chu 6-1, 7-6 (7/3) in a hneh a, third round-ah chuan seeded 23-na Jil Teichmann a hmachhawn leh ang.

American tleirawl Coco Gauff pawhin Alison van Uytvanck 6-1, 7-6 (4) a hnehin third round a lut. Kum 18 mi Gauff hian season hmasa khan quarterfinal a lut - Grand Slam a khelh tawha a thlen san ber a ni, kuminah khum ngei a tum dawn.