Mittui nen Mourinho a champion leh ta

Khawvelah hian awm ve ngeia hriat, hmuh zen zen loh pahnih a awm - i ngaihzawng leh Jose Mourinho mittui! Ningani zan khan Jose Mourinho mittui hmuh a ni a, lawm avanga tla a ni.

Pa rorum, ropui leh rothap, football khawvela nomawi chawi theih apiang chawitu, treble champion a nih meuh pawha mittui seng lo Mourinho kha a ṭap a, Europa Conference League-a AS Roma a champion pui vang a ni - kan dem lo e!

Ningani zan khan Europa Conference League final chu khelh a ni a, AS Roma hian champion turin Feyenoord chu 1-0 in an hneh a, inkhela goal awmchhun hi Nicolo Zaniolo khung a ni.

Mourinho-a'n Champions League, Europa League leh UEFA Cup-ah a team te a lo champion pui tawh bawk a, coach zingah European football inelna sanga a team-te champion pui vek thei hmasa ber record a siam.

Mourinho Final
Feyenoord-in inkhel ṭantir lamah an thunun zawk a, mahse, awmze neiin Roma an nawr thei lo - Italian club zawkin goal an khung a, minute 32-naah Zaniolo chuan hmahruaina goal a khung.

Gianluca Mancini-a cross aṭanga ball kal chu Feyenoord centre back Gernot Trauner chuan a ball kal dan a chhut sual a, Nicolo Zaniolo chuan a awma lo la thlain goal-ah a chantir.

Dutch club tan Orkun Kokcu leh Cyriel Dessers ten chance nei ve mah se Roma keeper Rui Patricio tih buaina khawp a tling zo lo a, Wolverhampton Wanderers keeper hian harsatna nei loin a dang.

Roma-in goal khung belh aiin a venhim lam an ngai pawimawh a, Feyenoord-in an duh angin an nawr thei lo bawk - inkhel hmuhnawm tia sawi tur a ni lo.

Roma an dingchang
Second half ṭan hnuah Feyenoord inkhel a nung sawt a, ṭan aṭanga minute hnih lekah chance duhawm an nei - corner aṭanga ball kal zel chu Roma defender Gianluca Mancini chuan a lo dang per a, post a tih per!

A per lehlam hi Guus Til ke bulah a tla a, mahse, Dutch mdifielder chance duhawm chu Rui Patricio chuan a lo dansak. Tyrell Malacia leh Lutsharel Geertruida khung tura lang a dansak pawh keeper ṭha bik tih awm renga mawi a ni.

Roma tan Lorenzo Pellegrini chuan chance duhawm nei ve zui mah se goal-ah a chantir thei lo a, Feyenoord-in si phurh sutna remchang an neihah Bryan Linssen chuan hnai set sawt aṭangin a hlah bawk.

Hun tawp thlengin team pahnihin goal an khung tawh lo a, Roma an champion - kum 1961-a Fairs Cup an champion hnua European football-a an champion leh hmasak ber a ni.

Smalling & Abraham
Jose Mourinho-a'n Manchester United a enkawl laiin Chris Smalling a duh lo a, English defender hi a chhuahtir - Roma a pan pawh khan Smalling hi a dah ṭhat leh mai ring an tam a, mahse, Mourinho tan player pawimawh a ni.

ECL final-ah pawh Smalling a khel ṭha takzet a, second half ṭantira Feyenoord phur vanglaia dangchattu ber chu Smalling a, ECL top scorer ni lai Cyriel Dessers dah ṭhatu pawh Smalling bawk a ni tlat.

Chelsea duh loh Tammy Abraham pawh a che chhe lo - tlarhmaah Dutch club tana buaina thlentu a ni a, English striker hi goal khung ngei tura a lan laiin Roma defender Marcos Senesi chuan a titlu a, mahse, referee-in foul-ah a ngai tlat lo!

Roma-in goal khung belh lo mah se goal an chhuah loh miau avangin an chak a, Mourinho-a'n European final-a a team a hruai thlen match ngaah hnehna a chang vek - UEFA Cup (1), Champions League (2), Europa League (1) leh ECL-ah te a champion tawh.

Mou a cham dawn
Sum ngah thar Newcastle United-in Mourinho thlem chhuah an tum dawn nia sawi thawm a awm a, chutiang boruak karah chuan a champion zui - hei hian Mou chhuah mai rinna a tilian lehzual.

Mahse, a career-a nomawi 26 chawi tawh Mourinho chuan, "Ka cham dawn tihah rinhlelh tur a awm lo. Thuthang a lo awm a nih pawhin Roma-ah ngei hian cham ka duh a ni. Kan club neitu, fel em emte hian season tharah enge tih an duh dawn, tih kan ngaihtuah tel a ṭul.

"Mi langtlang tak an ni a, anni nen hian hmachhawp ṭha tak kan neih theih ka beisei. Romanista dik takah ka inngai a, ka hnathawh dan vang a ni mai thei. Porto, Inter leh Chelsea fan ka ni a, Real Madrid ka ngaihven em em reng bawk. Tunah chuan Roma fan ka ni a, heng club zawng zawng nen hian thil tam tak kan tawng ho a, an zinga mi ka ni reng a ni," a ti.

Kum 59 mi Mourinho hian season ṭan dawn khan Roma hi a zawm a, a champion pui nghal - kum 2017-a Europa League-a Manchester United a champion pui hnua nomawi a chawi leh hmasak ber a ni a, Mou a la thamral lo e!

Ka career-a thil ropui tak pakhat chu, Manchester United tana Europa League nomawi ka chawi kha chu sawi lo ta ila, FC Porto, Inter Milan leh Roma tana nomawi ka chawi hi a hlu em em a ni. Mi zawng zawngin nomawi chawi tura min beisei laia champion te, champion tura sum tam tak sen te hi chu thil dang daih a ni a, tuna ka champion ang hi chu a hlu bik a, a cham reng tawh dawn a ni. Roma chauh ni lo, ka thinlungah pawh zanina kan hun tawn hi a cham reng tawh ang. Sir Alex Ferguson, Giovanni Trapattoni leh kei chauh hi kum 30 chhunga decade (kum 10) khat ṭheuha champion thei kan nih thu miin min hrilh a, ka upa ta sawtah inngai mah ila, thu hriat nuam tak a ni. - Jose Mourinho, Roma manager

Chawlh lai khan ka player-te chu tun aia ṭha zawka kan khelh a ṭul thu ka hrilh a, second half ṭan phat aṭang khan kan hriam nghal. Mahse, vanneihna kan mamawh tel a, kan mamawh chu kan hmu si lo a ni. Goal khung theihna hun kan nei a, mahse kan khung lo - kan elpuite quality vang pawh a ni mahna. - Arne Slot, Feyenoord coach