Match 300 chak thei Nadal

Rafael Nadal chuan mellung pawimawh a phun leh ta. Spanish star hian Corentin Moutet chu 6-3, 6-1, 6-4 a hnehin French Open third round a lut - inelna lian Grand Slam huangah match 300 zet a chak tling ta.

Grand Slam match chak hnem ber chu Roger Federer (369 wins) a ni, a dawtah Novak Djokovic (325) a awm. Hnehna chan hnem lamah Nadal hi pathumna a ni a, nomawi chawi hnem lamah erawh a chungnung ber thung - vawi 21 a champion tawh!

Nadal a ropui
Tennis khelh dan phung a inang lo, thiam leh class sang tih ber pawh a inang lo ang. Nadal khelh dan pawh ngainatu tam tak karah sawiseltu pawh an awm ve tho, player hlawhtling berte zinga mi a ni tih erawh kan pawm tlan a ngai.

French Open bikah vawi 13 a champion tawh, kuminah hian inbuatsaihna nei ṭha tawk lo mah se rinkai a ni. Match hnih a khelh tawh chinah set a la hloh miah lo, a service chu hloh ve bawk mah se chak turin a khingpui service a chhuhsak hnem zawk zel.

Kum 35 mi Nadal chuan, "Player ṭha leh thiam, talent nei ṭha tak hmachhawn hi chu a harsa ṭhin. Tun hnai ka hun hman leh khelh dan thlir chuan ka chak hi ka lawm, ka thlen chinah erawh hmasawn ka la ngai hle," tiin a sawi.

Third round-ah chuan seeded 26-na Boticvande Zandschulp a hmachhawn leh ang. Dutch tlangval hian a match hmasaah Fabio Fognini a hneh thei a, match hnih aṭanga set khat chiah a la hloh avangin Nadal tan fimkhur a ngai ang.

Novak a chungnung
Champion lai Novak Djokovic chu dan theih lohin a kaltluang mek. World number 1 hian Alex Molcan chu 6-2, 6-3, 7-6 (7/4) a hnehin second round a paltlang. A hneh tak Molcan hi tun hma lama Novak lo enkawl tawhtu Marian Vajda kaihhruaina hnuaia khel a ni.

Roland Garros-ah a zawnin kum 17 chhung chu Djokovic-a'n last 32 a lut ta, a match lehpekah chuan Slovenian player Aljaz Bedene nen an intawng ang; Bedene tan Djokovic hneh tur chuan thilmak a thlen a ngai ang.

Grand Slam vawi 20 champion tawh Djokovic chuan, "Grand Slam-ah chuan eng match mah a awlsam ngai lo, set hloh loa ka tlang thei hi a lawmawm hle. Tunah chuan ka khelh chinah lawmna tur lam zel a la ni," tiin a sawi.

Serbian star hian Paris khawpuiah hian nomawi vawi hnih a chawi tawh, kuminah hian a champion leh thei a nih chuan Grand Slam nomawi chawi hnem lamah Nadal (21 titles) a nih rual leh chiah ang.

Inkhel dang
Nilaini zan inkhel dangah Carlos Alcaraz leh Alexander Zverev te pawhin hnehna an chang, player pahnih hian second round paltlang turin vanneihna an mamawh tel ve ve, harsa takin third round an in vaw kai hram.

Spanish rawlthar, champion tura rinkai zinga mi hian a khingpui Albert Ramos-Vinolas-a'n match point a hmuh tawh chu 6-1, 6-7 (7-9), 5-7, 7-6 (7-2), 6-4 in a pawtthla hram - kum 19 mi hian major tournament boruak chu a danglam tih a zir chhuak ngei ang.

German tlangval Zverev pawhin vanneihna a mamawh, inkhel inhnehtawk takah Argentine tlangval Sebastian Baez chu 2-6, 4-6, 6-1, 6-2, 7-5 in a hneh hram, a vawi khat nana major title lak a duh a nih chuan tha khek chunga chak a zir a ngai.

Zverev chuan, "Tournament aṭanga ka tla lo hi ka lawm, player ropui dangten an neih rilru paukhauh leh rorum ang hi ka neih ve a ngai," a ti. A match lehpekah chuan American player Brandon Nakashima a hmachhawn leh ang.