Celtics tan match khat chak a la ngai
NBA Finals lut turin Boston Celtics chuan an dinhmun an siamṭha, vawi khat an chak leh thei a nih chuan khawvela basketball inelna sang leh lian ber final khel turin an tling ang.
Nimin zing khan Eastern Conference game 5 khelh niin, a tir lama che fuh lo Boston Celtics hian Miami Heat chu 93-80 in an lehthal a, best of seven series-ah 3-2 in hma an hruai - Inrinni zingah game 6 an khel leh dawn a ni.
Chawlhlawk laiin Celtics hi 42-37 in an hniam zawk, mahse Jaylen Brown-a'n team tan a theihna sang tak a lantir, point 25 neiin basket neih harsatna hmunah a team a chakpui, tlang turin beisei an nei sang nghal bawk.
Jayson Tatum chuan point 12 a neih bakah rebound vawi 12 a la bawk a, kum 2010 hnua a vawi khat nan NBA Finals luh an tum ruh hle. Mahse, inkhel a la zo lo - Miami Heat lamin a hnuhnung pahnihah hnehna an chan chuan an la tlang daih thei.
Celtics coach Ime Udoka chuan, "Kan tum ram kan hnaih tawh viau, amaherawhchu kan lak aṭang hian laksawn daih theih a la ni reng tih kan hriat a ngai. Kan khelmualah game 6 an khel dawn, hman ṭangkai ngei kan tum ang," tiin a la ṭawng fimkhur hle.
Tukin zing dar 6:30 hian Western Conference finals game 5 an khel dawn. Golden State Warriors chuan Chase Center-ah Dallas Mavericks an lo mikhual ang. Warriors hian series-ah 3-1 in hma an hruai mek, an chak chuan conference champion an ni ang.
Eastern Conference Finals
Game 1: Miami Heat 118 - 107 Boston Celtics
Game 2: Miami Heat 102 - 127 Boston Celtics
Game 3: Boston Celtics 103 - 109 Miami Heat
Game 4: Boston Celtics 102 - 82 Miami Heat
Game 5: Miami Heat 80 - 93 Boston Celtics
May 28, Inrinni
Game 6: Boston Celtics 06:00 AM Miami Heat
May 30, Thawhṭanni
Game 7: Miami Heat 06:00 AM Boston Celtics
(Celtics lamin series-ah 3-2 in hma an hruai)
Western Conference Finals
Game 1: Golden State Warriors 112 - 87 Dallas Mavericks
Game 2: Golden State Warriors 126 - 117 Dallas Mavericks
Game 3: Dallas Mavericks 100 - 109 Golden State Warriors
Game 4: Dallas Mavericks 119 - 109 Golden State Warriors
May 27, Zirtawpni
Game 5: Golden State Warriors 06:30 AM Dallas Mavericks
(Golden State hian series-ah 3-1 in hma an hruai)
Note: Best of seven series hmangin chak zawk zawn tur a ni)