IPL hapta hnuhnung

Thla hnih tal tawp Maharashtra state-a stadium paliah team 10 an intum kual a, vawi 70 tehmeuh an inkhel - Maharashtra hian inelna lian Tata Indian Premier League 2022 chu zo takin an thleng. Team pali Gujarat Titans, Rajasthan Royals, Lucknow Super Giants leh Royal Challengers Bangalore ten playoff an thleng.

Team pali belhkhawmin IPL nomawi an chawi tawh zat chu vawi khat chauh a ni a, IPL hmasa ber 2008-a fam chang ta Shane Warne a hoa Rajasthan-ten an chawi kha a ni. Gujarat Titans leh Lucknow Super Giants te club thar an ni a, Royal Challengers Bangalore an la champion lo!

Sulhnu nei ṭha Mumbai Indians, Chennai Super Kings leh Kolkata Knight Riders te champion tawh zat belhkhawm chu vawi 11 a ni a, tun season-a an khelh dan erawh theihnghilh tlak a ni. Thlensan luhai nei Delhi Capitals lahin anmahni bak inmawhpuh tur an nei lo tih an chiang. Bul ṭan ṭha, a tawpa tha nei tawh lo Sunrisers Hyderabad leh Punjab Kings ten an hliam tuam dam bak tih theih an nei tawh lo bawk.

Final 4
Mizoten semifinal kan tih mai hi IPL-ah chuan a dan tlema her danglam hret a ni. Group stage-a a sang pahnihin qualifier 1 khelin, a chak zawk zawk hi final an lut nghal. Team thar ni tih hriat loh khawpa rawn talna Gujarat Titans ten an khelmual Ahmedabad a khelh tur, tun Pathianni Final atan an ticket an book fel ta.

Heta vanduai zawk Rajasthan Royals tan final luhna kawng a la inhawng. Zanin hian Rajasthan hian Bangalore nen qualifier 2 an khel ang, a chak zawkin final an khel ang. Nilaini zan khan Eden Gardens-ah Bangalore hian pathumna Lucknow Super Giants hnehin final an lut.

League round-a pakhatna Gujarat-in final an lut tawh a, pahnihna Rajasthan-in hun ṭha vawi hnihna an hmang ṭangkai a nih chuan pakhatna leh pahnihnaten champion an inchuh ang. Chutihrualin Bangalore an chak ta zawk a nih chuan pakhatna leh palinaten final an khel thung ang.

Bihchianna
Zawhna ka dawn hnem ber chu, team thar, bul ṭan thar ni si, Gujarat Titans leh Lucknow SG te hi eng vangin nge kumin IPL-ah an chet ṭhat em em, tih hi a ni. Lucknow SG erawh Nilaini zan inkhelah, Bangalore laka an vanduai tak avangin an bedding an tel a ngai ve ta a, knockout stage ropui danglamna tiin a sawi theih.

Chiang deuh zawka kan bih chuan, team dang zawng zawng aia kumin IPL-a Gujarat Titans ho hlauhawmna chu, Powerplay laia lehlam batsman pawimawh an vawm hlun hnem hi a ni. Inkhel apiangin over hmasa parukah hian, lehlam top order batsman pathum ang vel dressing room-ah an tir let zel ang vel an ni.

Hetianga chhum lo chat lova tithei tur hian, an ball vawm thiam Md Shami, Rashid Khan leh Lockie Ferguson te inkawp fuh lutuk leh an bowling coach Ashish Nehra hi lam hmaih chi a ni lo. Mahni kova mawhphurhna an tlak a, puitling ta sawt an tihtur zinga mi kaptan Hardik Pandya hi engkima hmahruaitu a ni bawk.

Tun Pathianni zan hian a tawpna atan hmawr bawk fuh thei tak maw, nge Delhi Capitals kan sawi angin, thlensan luhai an nei ve dawn.

Qualifier 2
Zanin lamah khawvela cricket khelmual lian ber, mipui nuai khat leh sing thum chuang lenna, Ahmedabad khuaa, Modi Stadium-ah qualifier 2 khelh a ni dawn.

Qualifier 1-a tawlhthlu Rajasthan tan tun ṭum IPL-ah pawh century vawi thum ngawt vaw chhuak tawh, tun hnai tea a petrol reserve tlan kang ta deuh anga lang Jose Buttler-a'n pa chan a chan a ngai ngei ang.

Season tin deuh thaw hetiang Qualifier leh Final vela battery zo ziah Bengaluru lam hian, vawi khat na na chu he record lungchhiatthlak zet hi thaibo an duh ngei ang. Chumi thlen thei tur chuan tournament tira, mangchhia hmang, tun hnaia a ze ngai rawn hmu let tan Virat Kohli leh captain Faf du Plessis te an pawimawh hle ang.

Nilaini zan Eliminator inkhela Rajat Patidar a khawsak dan khan Bangalore dressing room chu nasa takin inrintawkna a pe ang tih a hriat theih. Tunah chuan Bangalore hi midang result vanga playoff lut ve hram anga en chi an ni tawh lo - Lucknow Super Giants hnehtu an ni tawh tlat.

Happy Weekend
Zanin Zirtawpni zan Qualifier 2 inkhel a, a chak zawk zawk hahdam taka mahni khelmual ngeia lo tum turin Gujarat Titans te hian tu nge an hmachhawn ang?

Rajasthan Royals-in final lutin Thawhlehni zan qualifier 1-a an hneh loh Titans lakah phuba an la thei. Chutihrualin Gujarat hian IPL an khelh hmasak berah nomawi an chawi thei a, Virat Kohli telna Royal Challengers Bangalore hun a inher chhuak thei bawk.

Engpawh nise, thil pakhat erawh a chiang. Cricket khawvelin Friday Blockbuster leh Super Sunday hun kan thleng leh dawn e.

- K. Vanlalruata