Salah a chhuak dawn lo

Liverpool forward Mohamed Salah chuan season tharah Anfield chhuahsan tumna a neih loh thu a sawi a, June 2023 thleng bak contract nei tawh lo forward hian a hma hun zel tur erawh a sawi lawk thei bik lo.

Salah chuan, "Ka contract chungchang sawi ka duh lo a, Jordan Henderson-a'n Champions League nomawi chawi se tih hi ka duh chu a ni mai. Tun ang huna contract sawi a, mahni hma lo sial hi ka duh lo.

"Season tharah chuan Reds-ah hian ka cham dawn chiang," a ti a, rei tak chhung an inrem theih lohna contract thar chungchang erawh a sawi lang duh lo.

Khawthlang media ṭhenkhat chuan Salah hian contract thar a ziak lo a nih chuan, a hnu season-a a thlawna chhuahtir ai chuan Reds hian an hralh mai an ring a, mahse, Salah thusawi hi rin tur a nih chuan season khat tal chu a la cham dawn.

Salah hian kum 2017 khan AS Roma aṭangin Liverpool hi a zawm a, match 253-ah goal 156 khungsakin assist vawi 63 a nei a, Premier League, Champions League, FA Cup, League Cup, FIFA Club World Cup leh UEFA Super Cup-ah champion nomawi a chawipui.

May 28, Pathianni zan dar 12:30-ah Liverpool hian Champions League final khel turin Real Madrid an hmachhawn dawn a, Salah chuan, "Ka phur tawh takzet. Kum 2018 final-ah kan ngam lo a, kha vang khan final khelh leh hi kan châk tawh - kan vaiin kan phur em em a, theihtawp kan chhuah ang," a ti.

Hetihlai hian Reds-a Salah-a khelhpui Sadio Mane pawhin final zawhah a hma hun tur a tihchian tur thu a sawi - Senegalese forward hian season khat dang bak contract a nei tawh bik lo.

Mane chuan, "Anfield-ah ka cham zel dawn nge, dawn lo tih chu Champions League final zawhah ka tichiang ang," a ti a, media ṭhenkhat chuan CL final result hian Reds player ṭhenkhat hma hun a nghawng dawn niin an sawi.

Mahse, Liverpool boss Jurgen Klopp chuan, "Kan result-in engmah a hril dawn lo. Ka player-te nen hian inbiakna kan nei lawk vek a, tun hi kan inbiakna sawi hun a la nih loh avangin kan ngawi rih mai a ni.

"Ka player-te hi an hma hun hre lawk loa awm tumah an awm lo. Player-ten ngaihdan an nei a, keini pawhin kan nei a, a chang chuan kan sawi ho a, a inrem nghal thlap ṭhin. A chang chuan a inrem nghal bik lo a, chinfel tumin kan thawk ho ṭhin - kan inhrechiang em em vek a ni," a ti a, a player-ten Anfield-a an hma hun an hre lawk sa vek niin a sawi.