Transfer bazar-ah Chelsea an che na dawn

Chelsea neitu thar Todd Boehly leh a thawhpuite chuan transfer bazar-ah sum ren an tum dawn lo niin an lam hnai tak pakhat chuan a sawi a, Blues fan-te tan lawmna tur a ni.

Boehly leh a thawhpuite hian pound tluklehdingawn 4.25-in Chelsea hi lei turin inremna an neihpui a, Premier League leh UK sorkar pawhin London club hralhna hi an pawmpui tawh - an inchinfel thuai a rinawm.

Chelsea neitu tharten transfer bazar-ah sum ren an tum loh rualin, an squad-ah hmun ruak hnawh khah tur a awm nual nghal dawn a, pawisa nei mah se leichhuah tur player an awm ang em, tih chu zawhna lian zawk a ni.

Chu mai a ni lo - player langsar chhuak tur an awm nual a, an hmun ruak hnawh khah a awlsam dawn lo. Centre back Antonio Rudiger chuan free transfer-in Real Madrid a zawm dawn a, Andreas Christensen-a'n Barcelona a zawm dawn niin an sawi bawk.

Club captain Cesar Azpilicueta meuh pawh a dinhmun sawi chian theih a ni lo a, Spanish defender hian Barcelona nen inbiakna an neih mek avangin an ram lama kir a duhin a rinawm.

Boehly chuan club manager Thomas Tuchel nen inbiakna an nei vat dawn nia sawi a ni a, player chhuak turte hmun ruak luah tur chungchang an sawi dun ang - London club hi Sevilla centre back Jules Kounde nen sawizawm an lo ni tawh.

Chelsea hian midfielder pawimawh pahnih N'Golo Kante leh Jorginho pawh contract thar ziak tura dawr an tum a, player pahnih hi nakkum nipuiah an contract a zo tawh dawn a, hun rei zawk thlun ngheh an tum.

London club hian an academy chhuak pahnih midfielder Mason Mount leh defender Reece James pawh hlawh tam zawk hlawh turin contract thar pek an tum a, anni pahnih hi Chelsea squad-ah chuan an hlawh a tlem nia sawi a ni.

Kum 23 mi Mount hi a zawna Chelsea Player of the Season ni lai a ni a, tun season inelna hrang hrangah match 53 khelin goal 13 a khung a, assist vawi 16 a nei bawk.

England international hian kar khatah £88,462 a hlawh nia sawi a ni a, London club hian a leta tihpunsak an tum. Right back ṭha mi James-a'n kar khatah £58,000 a hlawha sawi a ni a, tun season match 39 aṭanga goal ruk leh assist vawi 10 nei thei tan chuan a tlem deuh.

James pawh hi a let talin a hlawh hi an san a rinawm a, tuna Chelsea-a hlawh hnem ber Romelu Lukaku chuan kar khatah £325,000 a hlawh nia sawi a ni.