Kompany leh Burnley an inbia

Manchester City captain hlui Vincent Kompany chu a club enkawl Anderlecht nen an inṭhen a, tunah chuan Premier League aṭanga tla hlim Burnley nen sawizawm an ni - Championship lamah a hmel kan hmu a nih pawhin a mak lo ang.

Kum 36 mi Kompany hian an ram league-ah Anderlecht hi pathumna a nih pui a, Belgian Cup-ah pahnihna an ni bawk. Club nen hian inhriatthiam tawnna in an inṭhen a ni. Anderlecht hi inelna hrang hrangah match 96 a kaihruai a, vawi 43 hnehna a chanpui.

EPL aṭanga tla hlim Clarets hian American finance company MSD Holdings aṭangin loan an la, an loan lak hi pound maktaduai 65 a ni. English football inelna sanga kir leh turin thapui thawh nghal an tum.

Kompany-a nupui Carla-i hi Manchester khaw mi a ni a, team enkawl hna bakah nupui te ram lama hna thawk tur a kal a hreh lo tura ngaih a ni. Man City-ah kum 11 hun a hman tawh bawk avangin a mikhual lo.