Schick-a'n contract a pawtsei

Bayer Leverkusen chuan striker rinrawl Patrick Schick an chelh a, June 2027 thleng contract an ziahpui. Kum 26 mi Schick hian tun season Bundesliga-ah goal match 27 khelin goal 24 a khung a, Czech Republic striker hian a vanglai hun a hmang chho mek.

Schick hian theihna sang tak nei mah se Euro 2020-ah khan a hming a chher lehzual a, Cristiano Ronaldo nen goal nga ve ve an khung. Leverkusen striker hian Scotland an hneh ṭumin 45 metres aṭangin a khung a, goal of the tournament-a thlan a nih bakah FIFA Puskas Award nominee-ah a tel pha bawk.

Feet ruk leh inches thuma sang Schick hi Bayern Munich nen pawh sawizawm a ni a, amaherawhchu contract a pawhsei takah chuan la chhuak turin sum ṭhahnem tak hman a ngai tawh ang.

Leverkusen hian Czech Republic winger Adam Hlozek chu Sparta Prague aṭangin an lalut dawn a, inremna an nei fel tawha ngaih a ni. Hlozek hi kum 19 mi chauh a ni a, Czech Republic tan vawi 12 khel tawhin goal khat a khung tawh.